لاہور (نیوز ڈیسک) سنی اتحاد کونسل پاکستان کے چیئرمین صاحبزادہ حامد رضا نے دعویٰ کیا ہے کہ قوم جلد اپوزیشن کے گرینڈ الائنس کی خوشخبری سنے گی ،پاک سرزمین کے نام سے نئی جماعت ملکی سیاست میں تازہ ہوا کا جھونکا ہے،حکمرانوں نے قائد اعظم کے خواب چکنا چور کردیئے ہیں۔ ان خیالات کا اظہار انہوں نے لاہور میں صاحبزادہ ابو الخیر ڈاکٹر محمد زبیر، ثروت اعجاز قادری ، پیر اعجاز ہاشمی اور علامہ احمد علی قصور ی سمیت مختلف اہلسنّت رہنماﺅں کے ساتھ گفتگو کرتے ہوئے کیا۔ صاحبزادہ حامد رضا نے کہا کہ این اے 101سے معمولی مارجن سے کامیابی ن لیگ کیلئے لمحہ فکریہ ہے،وزیر آباد میں جیت کی خوشی میںلیگی کارکنوں کی غنڈہ گردی قابل مذمت ہے۔ن لیگ کا این اے 101میں صرف 1600ووٹوں سے جیتنا بے معنی ہے۔انہوں نے کہا کہ داعش کے خلاف عالمی اتحاد ناگزیر ہو گیا ہے۔داعش عالمی امن کیلئے بڑا خطرہ بن چکی ہے۔حکومت شمالی وزیرستان میں روزگار کے فراہمی پر توجہ دے اور آئی ڈی پیز کی گھروں کو واپسی اور بحالی کیلئے اقدامات تیز کئے جائیں۔ قومی اتحاد ہی اندرونی و بیرونی دشمنوں کی موت ثابت ہو سکتا ہے۔آئی ایم ایف سے جان چھڑوانے تک معیشت مضبوط نہیں ہو گی۔ حکومت کے اسلام مخالف اقدامات اقدامات سے دین دار طبقہ اضطراب اور تشویش میں مبتلا ہے۔وزیر اعظم کا لبرل ازم کا نعرہ آئین کے منافی ہے۔ہم حکمرانوں سے پورے آئین پر عمل کا مطالبہ کرتے ہیں۔