ماسکو/اسلام آباد(نیوز ڈیسک) پاکستان سے روس جانے والے تاجروں کو روسی امیگریشن حکام نے ایئرپورٹ پر ہی روک لیا جبکہ دفترخارجہ نے روسی سفارتخانے سے رابطے تیز کرتے ہوئے معاملے کے حل کے لئے کوششیں تیز کردیں۔ اطلاعات کے مطابق پاکستان سے روس جانے والے 188 پاکستانی تاجروں کو ماسکو ایئرپورٹ پر امیگریشن حکام نے روک لیا جنہیں موبائل فون کمپنی کنونشن کی تقریب اور سیروتفریح کےلئے بلایا گیا تھا، روسی امیگریشن حکام نے 84 تاجروں کو دستاویزات مکمل نہ ہونے کے باعث روک لیا جب کہ دیگر تمام تاجروں کو چھوڑ دیا۔دوسری جانب پاکستانی سفارتخانے کا عملہ بھی ایئرپورٹ پہنچ گیا جہاں پاکستانی تاجروں کی دستاویزات سے متعلق حکام سے بات چیت کی جارہی ہے، محصور تاجروں میں سے 80 افراد کا تعلق کراچی، 35 کا تعلق لاہور اور باقی کا اسلام آباد سے بتایا جا رہا ہے۔محصور تاجروں میں سے ایک تاجرعبدالواحد کا کہنا تھا کہ انہیں کچھ پتہ نہیں کیوں روکا گیا ہے، وہ ویزہ لے کر آئے ہیں، 3 دن ماسکو اور 3 دن سینٹ پیٹرزبرگ میں قیام کرنا تھا پہلے 2 3 لوگوں کو جانے دیا گیا جن میں وہ بھی شامل تھے۔ باقی لوگوں کو روک لیا گیا اورابھی ہم ایئرپورٹ پر ہی تھے کہ ہمیں بھی ڈھونڈ کر واپس لا کر ایک کمرے میں بند کردیا گیا ہے۔