اسلام آباد (نیوز ڈیسک) وفاقی وزیر اطلاعات ونشریات سینیٹر پرویز رشید نے کہا ہے کہ نیب کے حوالے سے مشاورت سے ایسا نظام بنانا چاہئے جس سے بدعنوان بچ نہ سکے اور کسی بیگناہ کی پگڑی اچھالی نہ جاسکے ۔ جمعرات کو قومی اسمبلی میں پیپلزپارٹی کے عمران ظفر لغاری کی طرف سے قومی احتساب بیورو (نیب) کی کارکردگی سے متعلق ہونیوالی بحث سمیٹتے ہوئے وزیراطلاعات نے کہا کہ بحث میں اٹھائے گئے نکات توجہ کے قابل ہیں ، ایوان کو ان پر ضرور غور کرنا چاہئے، ایک رکن نے کہا کہ احتساب میں کسی کی پگڑی نہیں اچھالنی چاہئے بلکہ ایک دوسرے رکن نے کسی کی پگڑی اچھالنے سے گریز نہیں کیا، کے پی کے حکومت نے اپنے ہی بنائے ہوئے احتساب قانون کو تبدیل کیا جس پر ان پر تنقید بھی کی گئی، سابق وزیراعظم ظفر اللہ جمالی نے جن امور کی طرف توجہ دلائی ہے اس پر غوروخوض ہونا چاہئے، ماضی میں احتساب کے نام پر پارٹیاں توڑی اور نئی پارٹیاں بنائی گئیں، احتساب کے حوالے سے اچھی اور بری دونوں طرح کی کارکردگی موجود ہے، چیئرمین نیب کا تقرر حکومت اور اپوزیشن کی مشاورت سے ہوا وہ خود کہہ چکے ہیں کہ نیب بارے جائز شکایات کا ازالہ کرنے کی ضرورت ہے، مشاورت سے ایسا نظام بنانا چاہئے جس سے بدعنوان بچ نہ سکے اور کسی بےگناہ کی پگڑی اچھالی نہ جاسکے۔