فیصل آباد (نیوز ڈیسک) وزیر مملکت برائے پانی و بجلی عابد شیر علی نے کہا ہے کہ شاہد آفریدی اور کچھ دیگر کھلاڑی چلے ہوئے کارتوس ہیں‘ عمر اکمل اور ساتھی کھلاڑی نے چھ اوورز میں ایک چوکا بھی نہیں لگایا‘ کرکٹ ٹیم میں گروپنگ صاف نظر آرہی ہے‘ سیاست کرنے والے کھلاڑیوں کو تاحیات بین کیا جائے۔ وہ بدھ کو یہاں میڈیا سے گفتگو کررہے تھے۔ عابد شیر علی نے کہا کہ نیوزی لینڈ کے خلاف میچ میں کھلاڑی ایک دوسرے کو نیچا دکھانے کے لئے کھیل رہے تھے۔ بدقسمتی سے بیٹسمینوں نے انتہائی ناقص کارکردگی کا مظاہرہ کیا۔ پورا ملک ٹی وی سکرین کے سامنے بیٹھا قومی ٹیم کے لئے فتح کی دعائیں مانگ رہا تھا ایسے میں مسلسل چھ اوورز میں ایک بھی چوکا نہ لگنا شرمناک ہے۔ انہوں نے کہا کہ کرکٹ ٹیم میں گروپنگ صاف نظر آرہی ہے۔ شاہد آفریدی اور کچھ دیگر چلے ہوئے کارتوس ہیں۔ ان کھلاڑیوں کو نکال کر نئی ٹیم بنا کر نئے عزم کے ساتھ کھیلا جائے وہ شکست کھائیں گے بھی تو اتنی شرمناک نہیں ہوگی۔ انہوں نے کہا کہ سیاست کرنے والے کھلاڑیوں کو تاحیات بین کیا جائے۔