رحیم یارخان(نیوز ڈیسک) خفیہ اداروں کے اہلکار بن کر گھروں میں اہل خانہ کو یرغمال بنا کر لوٹنے والے بین الصوبائی گروہ کے خاتون سمیت پانچ اراکین گرفتار، اسلحہ برآمد، ایس پی انوسٹی گیشن عرفان سموں نے ڈی ایس پی سٹی فیاض احمد پنسوتہ ، ایس ایچ او اے ڈویژن انسپکٹر اظہر اقبال ، پی ایس اور رانا محمد ارشد ، اسسٹنٹ سب انسپکٹر اشفاق چیمہ اور ڈیوٹی آفیسر رفیع اللہ نیازی کے ہمراہ میڈیا سے گفتگو کرتے ہوئے بتایا کہ کچھ عرصہ کے دوران سٹی ایریا میں ایک ایسا گروہ گھریلو ڈکیتی کی وارداتیں کر رہا تھا جو کہ اپنے آپ کو خفیہ اداروں کے اہلکار شو کرتے اور تلاشی کے بہانے گھر میں داخل ہو کر اسلحہ کی نوک پر اہل خانہ کو یرغمال بنا لیتے اور گھر میں موجود طلائی زیورات ، نقدی اور دیگر قیمتی سامان لوٹ کر فرار ہوجاتے اس گروہ میں ایک خاتون بھی شامل تھی پے درپے وارداتوں نے جہاں شہریوں کو خوف حراس میں مبتلا کر دیا تھا وہاں پر پولیس کی کارکردگی پر بھی سوالیہ نشان لگنے لگا تھا جس پر ڈی پی او ذیشان اصغر کے حکم اور ایس پی عرفان سموں کی ہدایت پر ڈی ایس پی سٹی فیاض پنسوتہ اور ایس ایچ اوز سٹی سرکل نے اپنی اپنی ٹیموں کو متحرک کیا اور شب وروز محنت کے بعد اس گروہ کا سراغ لگا کر اسے گرفتار کر لیا ۔ گرفتار ہونے والوں میں گروہ کی خاتوں ساتھی تسنیم کوثر ، اسفند یار ، ریحان ، حلیم اختر کا تعلق کوئٹہ سے ہے جبکہ محمد مدنی نامی ملزم رحیم یار خان کا رہائشی ہے ۔ ایس پی انوسٹی گیشن عرفان سموں نے بتایا کہ گرفتار گروہ بین صوبائی ہے جس نے دوران تفتیش رحیم یار خان کے علاوہ وفاقی دارالحکومت اسلام آباد ، لاہور ، کوئٹہ ، سیالکوٹ ، کراچی و دیگر شہروں میں بھی وارداتوں کا انکشاف کیا ہے ۔ گرفتار ملزمان کو جوڈیشل ریمانڈ پر ڈسٹرکٹ جیل منتقل کر دیا گیا ہے جہاں پر وارداتوں کے متاثرین و مدعیان مقدمات سے ملزمان کی شناخت پریڈ کرائی جائے گی ۔ اس سلسلہ میں مزید تفتیش جاری ہے اور مزید انکشافات متوقع ہیں ۔ انہوں نے بتایا کہ گرفتار گروہ کے زیر استعمال ایک عدد کار ، ایک پسٹل نائن ایم ایم اور ایک موزر بھی قبضہ پولیس میں لیا گیا اور اس سلسلہ میں اب تک تھانہ سی ڈویژن میں چھ اور تھانہ اے ڈویژن میں دو مقدمات درج رجسٹرڈ کئے گئے ہیں اگر مزید مدعی سامنے آئے تو قانون کے مطابق کارروائی عمل میں لائی جائےگی ۔