اسلام آباد (نیوز ڈیسک) پاکستان عوامی لیگ کے سربراہ شیخ رشید نے کہا ہے کہ پاک فوج نے ملک کو بحران سے نکالا ہے‘ سارے سیاست دان جرنیلوں کے پیدا کئے ہوئے ہیں۔ اصل میچ پاکستان اور بھارت کا تھا جو پاکستان ہار گیا ہے‘ ہم پی آئی اے کی نجکاری نہیں ہونے دیں گے۔ ان خیالات کا اظہار منگل کو پارلیمنٹ ہاﺅس کے باہر میڈیا سے گفتگو کرتے ہوئے کیا۔ انہوں نے کہا کہ پاک فوج نے ملک کو بحران سے نکالا ہے اور قوم بحران سے نکل آئی ہے۔ انہوں نے کہا کہ سارے سیاست دان جرنیلوں کے پیدا کئے ہوئے ہیں اور یہ فوج کی نرسری سے تیار ہوئے ہیں۔ انہوں نے کہا کہ پی آئی اے کا معاملہ 3 ہفتوں پر چلا گیا ہے۔ ہم پی آئی اے کی نجکاری نہیں ہونے دیں گے۔ ایک سوال کے جواب میں انہوں نے کہا کہ پرویز مشرف چلا گیا ہے اس سے پہلے بے نظیر بھٹو کو دوبئی سے بلانے کی کوشش کی گئی تھی مگر وہ واپس نہیں آئیں۔ پاکستان کرکٹ ٹیم کی ورلڈ کپ ٹی ٹوئنٹی کی کارکردگی کے حوالے سے ایک سوال کے جواب دیتے ہوئے انہوں نے کہا کہ اصل میچ پاکستان اور بھارت کا تھا جو پاکستان ہار گیا ہے۔ انہوں نے کہا کہ 23 مارچ کا دن میرے ایمان‘ جذبہ اور جوش کا دن ہے۔