کراچی (نیوز ڈیسک )سابق صوبائی وزیر صحت ڈاکٹر صغیر احمد نے بیان دیا ہے کہ مجھے ایسا لگتا ہے ایم کیو ایم نے ’’مارنے‘‘کا منصوبہ بنا لیا ہے ،فاروق ستار کی جانب سے آخری آرام گاہ اور ٹھکانے لگا دو جیسے الفاظ معنی خیز ہیں ، مارنے والی اور بچانے والی ذات اللہ کی ہے۔انہوں نے الطاف حسین کو چیلنج کیا کہ وہ واپس آئیں میں کہیں سے بھی الیکشن میں ان کا سامنا کرنے کے لیے تیار ہوں۔فاروق ستار کے بیان پر ردعمل کا اظہار کرتے ہوئے ڈاکٹر صغیر نے کہا کہ آخری آرام گاہ اور ٹھکانے لگادو جیسے الفاظ فاروق ستار کے نہیں ہو سکتے۔ان کا کہنا تھا کہ فاروق ستار کے ساتھ کھانا کھایا ہے اور وہ سینئر رہنما ہیں اس لیے ان کی باتوں کا برا نہیں منا یا لیکن اگر کوئی چیلنج کر رہا ہے تو پھر الطاف حسین ملک میں واپس آئیں ،ان کے خلاف کہیں سے بھی الیکشن لڑنے کے لیے تیار ہوں۔ڈاکٹر صغیر کا کہنا تھا کہ الطاف حسین بیرون ملک سے تقاریر کرنے کے بجائے ملک میں آکر الیکشن لڑیں ،دود ھ کا دودھ اور پانی کا پانی ہو جائے گا۔انہوں نے کہا کہ فاروق ستار الطاف حسین کی بے سرو پا تقاریر ہی بند کروالیں تو بہت بڑی بات ہو گی۔ڈاکٹر صغیر نے کہا کہ استعفی دینے کا کہا ہے تو اس پر عمل بھی کروں گا ،اس حوالے سے آغاسراج درانی سے بات ہوئی ہے ،وہ ابھی شہر سے باہر ہیں۔