کراچی (نیوز ڈیسک) ایم کیوایم کوختم کرنے اور اسے ٹکڑے ٹکڑے کرنے کے لیے ایک بارپھر 1992 والا ڈرامہ دہرایا جارہا ہے، ان خیالات کا اظہار ایم کیو ایم کے ترجمان کی جانب سے جاری بیان میں کیا گیا۔ جس میں یہ کہا گیا کہ ایم کیوایم کوختم کرنے اور اسے ٹکڑے ٹکڑے کرنے کے لیے ایک بارپھر 1992 والا ڈرامہ دہرایا جارہا ہے جب کہ الزامات لگانے والوں کے پاس ثبوت ہیں تو عدالتوں میں ثابت کریں۔جاری بیان میں کہا گیا ہے کہ الطاف حسین نے جب سے مہاجروں کے حقوق کے لیے جدوجہدکا آغازکیا تب سے اسٹیبلشمنٹ کی جانب سے مہاجروں کی اس واحد نمائندہ جماعت کوختم کرنے اور اس کے قائد کوراستے سے ہٹانے کی سازشیں کی جاتی رہی ہیں، ایم کیوایم میں کئی بارگروپ بنانے کی بھی کوششیں کی گئیں اور اس کے خلاف بدترین ریاستی آپریشن بھی کیا گیا۔ترجمان نے کہا کہ تمام ترسازشوں میں بری طرح ناکامی کے بعد اب ایک بارپھرمہاجروں سمیت تمام محروم عوام کی اس واحد جماعت ایم کیوایم کوختم کرنے کے 1992 والا ڈرامہ دہرایا جارہا ہے، الطاف حسین کو راستے سے ہٹانے کی بھرپورکوشش کی جارہی ہے۔ ترجمان کا کہنا تھا کہ ایم کیو ایم پر ’’را‘‘ سے تعلق کے بے ہودہ الزام سراسرجھوٹ اور بے بنیاد ہیں جنہیں مسترد کرتے ہیں اور اگر الزامات لگانے والوں کے پاس ثبوت ہیں تو ان الزامات کوعدالتوں میں ثابت کریں۔