لاہور/گوجرانوالہ(نیوز ڈیسک)سادہ لوح خواتین کو عمرے کا جھانسہ دیکر رقوم بٹورنے والے ٹریول ایجنٹ کی متاثر ہ خواتین نے ٹھکائی کر دی،ایف آئی اے کی ٹیم نے گجرات میں کارروائی کرتے ہوئے انسانی سمگلر کو گرفتار کر لیا ۔تفصیلات کے مطابق سول لائن کے علاقہ جناح اسٹیڈیم کے نزدیک واقع السعودیہ ٹریول ایجنسی کے مالک اشفاق احمد نے دیہی علاقوں کی خواتین کو عمرے کا جھانسہ دیکر رقوم بٹورنے کا دھندہ شروع کررکھا تھا اورگزشتہ تین ماہ سے ایمن آباد کے نواحی گاؤں کیرانوالی کی رہائشی خواتین زاہدہ ،کوثر سے عمرہ کرانے کے عوض دو لاکھ دس ہزار روپے وصول کرر کھے تھے جس کے رد عمل میں متاثرہ خواتین نے ٹریول ایجنسی پر پہنچ کر ٹریول ایجنٹ اشفاق احمد کی جوتیوں سے ٹھکائی کر دی ۔اس موقع پر متاثرہ خواتین نے کہاکہ ٹریول ایجنٹ کے کہنے پر ہم نے پانچ بار میلاد شریف پر بھاری رقم خر چ کی مگر ہر بار مقررہ تاریخ پر ٹریول ایجنٹ مذکورہ جھانسہ دیکر غائب ہو جاتا تھا ۔ اس دوران راہگیر تماشہ دیکھتے رہے اوردیگر ٹریول ایجنٹوں نے متاثرہ خواتین سے مذاکرا ت کے بعد فراڈ میں ملوث ٹریول ایجنٹ کی جان بخشی کرائی ۔علاوہ ازیں ایف آئی اے نے گجرات میں کارروائی کرتے ہوئے انسانی سمگلر کاشف سادہ لوح لوگوں کو غیر قانونی طریقے سے یونان بھجواتا تھا۔ ایف آئی اے نے گوجرانوالہ میں مختلف کارروائیوں کے دوران 6اشتہاری انسانی اسمگلرگرفتار کر لیا ۔ڈپٹی ڈائریکٹر ایف آئی اے شیخ خالد انیس کی خصوصی ہدایت پر اسسٹنٹ ڈائریکٹر چوہدری محمد سرور کی سربراہی میں سب انسپکٹر رانا مستحسن خاں ، سب انسپکٹر جاوید اقبال گھمن ، سب انسپکٹر خضر حیات مغل ‘ سب انسپکٹر وقار اعوان پرمشتمل ٹیم نے ڈویژن کے مختلف علاقوں میں کارروائیوں کے دوران متعدد اشتہاری انسانی اسمگلرگرفتار کر لیے گرفتار کیے گئے جن میں علی حسین ، فیصل ،یوسف ، محمد قاسم ، وسیم خالد ساکنان گوجرانوالہ، کاشف علی سکنہ گجرات شامل ہیں ۔