لاہور(نیوزڈیسک) بلدیاتی انتخابات میں شکست کے بعد پاکستان تحریک انصاف کے رہنماﺅں کے درمیان اختلافات شدت اختیار کرنے لگے ، شفقت محمود کی جانب سے بطور آرگنائزر لاہور کے مستعفی ہونے کے بعد اعجاز چوہدری نے بھی اپنے تحفظات کا اظہار کر دیا ۔ذرائع کے مطابق پی ٹی آئی پنجاب کے سابق صدر اعجاز چوہدری نے چند روز قبل پارٹی چیئرمین عمران خان سے لاہور میں ملاقات کی جس میں انہوں نے اپنے پارٹی امور کے حوالے سے اپنے تحفظات کا اظہار کرتے ہوئے پنجاب میں دوبارہ سے پی ٹی آئی کے پرانے سیٹ اپ کو بحال کرنے کا مطالبہ کیا تاہم عمران خان کی جانب سے انہیں کوئی مثبت جواب نہیں ملا۔ دوسری جانب بلدیاتی انتخابات میں شکست کے بعد شفقت محمود کی جانب سے بطور پی ٹی آئی لاہور کے عہدے سے مستعفی ہونے کے بعد کارکنوں کی جانب سے پنجاب کے دیگر شہروں کے آرگنائزرز سے بھی مستعفی ہونے کا مطالبہ کیا جا رہا ہے۔واضح رہے کہ تحریک انصاف نے پارٹی کا پرانا تنظیمی ڈھانچہ تحلیل کر کے سابق گورنر پنجاب چوہدری سرور کو اپر پنجاب جبکہ شاہ محمود قریشی کو زیریں پنجاب کا آرگنائزر بنایا تھا۔ اس سے قبل پورے پنجاب کے تمام امور اعجاز چوہدری دیکھتے تھے۔