اسلام آباد ( نیوزڈیسک) پاکستان میں چین کے سفیر سن وی ڈونگ نے کہا ہے کہ چین اور پاکستان، افغانستان میں امن بحالی کے عمل اور خطے میں مشترکہ مفادات کے تحفظ کےلئے انتہائی پرعزم ہیں۔ ہم نے سٹریٹجک اور اقتصادی تعاون اور دوطرفہ تعلقات کو بلندیوں کی نئی سطح پہنچانے کا فیصلہ کر لیا ہے۔ وہ بدھ کو یہاںبہار ”جنوبی اور مشرقی ایشیا میں سٹریٹجک استحکام میں چین کا تعمیری کردار“ کے موضوع پر سیمینار سے خطاب کررہے تھی۔ سیمینار کا اہتمام انسٹی ٹیوٹ آف سٹریٹجک سٹڈیز (آئی ایس اییس آئی) اور چائنا آرمز کنٹرول اینڈ ڈس آرممنٹ ایسوسی ایشن نے کیا تھا۔ سن وی ڈونگ نے کہا کہ علاقائی امن جنوبی ایشیا میں اقتصادی اور سماجی ترقی کی کنجی ہے۔ دونوں ملک خطے میں اپنے مشترکہ مفادات کے تحفظ کےلئے پرعزم ہیں۔ انہوں نے کہا کہ 2015ءپاک چین دوستی کا سال ہے۔ طلباءتھنک ٹینکس، ثقافتی طائفوں اور دیگر وفود کے تبادلوں سے دونوں ملکوں کے درمیان روابط مزید مستحکم ہونگے۔ انہوں نے کہا کہ چین مشترکہ مفادات کے تحفظ کےلئے سارک کے ساتھ تعاون کےلئے تیار ہے۔ پڑوسی ملکوں میں امن و استحکام کا فروغ چین کی خارجہ پالیسی کا محور ہے کیونکہ پرامن جنوبی ایشیا چین کے مفاد میں ہے۔ انہوں نے کہا کہ چین اور جنوبی ایشیا کے مابین تعاون غربت سمیت دیگر چیلنجوں پرقابو پانے کےلئے بھی ضروری ہے۔ سن وئی ڈونگ نے مزید کہا کہ چین پاکستان میں سرمایہ کاری کرنے والا سب سے بڑا ملک ہے اور ہم اس جنوبی ایشیائی ملک کے ساتھ تعلقات کو مزید فروغ دینے کےلئے کوشاں ہیں۔ انہوں نے کہا کہ چین نے علاقائی ملکوں میں مقامی ترقی کےلئے چین نے ایشین انوسٹمنٹ بینک قائم کر دیا ہے۔ چینی سفیر نے کہا کہ ہمیں سیکورٹی چیلنجوں پر قابو پانے کےلئے مل کر کام کرنا ہو گا۔ چین تمام علاقائی تنازعات کو بات چیت اور مذاکرات کے ذریعے حل کرنے کی حمایت کرتا ہے۔ چائنا آرمز کنٹرول اینڈ ڈس آرممنٹ ایسوسی ایشن کے صدر شازوکانگ نے سیمینار سے خطاب کرتے ہوئے کہاکہ چین جنوبی ایشیا میں امن و استحکام قائم کرنے کےلئے کوشاں ہے۔ انہوں نے کہا کہ پاکستان اتحادی نہیں بلکہ چین کا سدابہار دوست ہے۔ آئی ایس ایس آئی کے ڈائریکٹر جنرل مسعود خان نے بھی سیمینار سے خطاب کیا۔