فیصل آباد(نیوزڈیسک)فیصل آباد،بلدیاتی انتخابات،ن لیگ میں اختلافات بڑھ گئے . بلدیاتی انتخابات کی مہم کے دوران جھگڑے ایک ہفتے سے جاری ہیں اور لیگی کارکنان کئی مقامات پر ایک دوسرے پر فائرنگ کرنے کو بھی عام بات سمجھ رہے ہیں۔ غلام محمد آباد میں ایک واقعہ کا مقدمہ وزیر مملکت عابد شیر علی نے خود جا کر لیگی ایم پی اے ملک نواز کے بھائیوں کے خلاف درج کرایا۔ عابد شیر علی نے مقدمہ درج کروانے کا جواز ن لیگ کے ایم پی اے ملک نواز کی جانب سے کی جانے والی اس پریس کانفرنس کو قرار دیا جس میں ملک نواز نے کچھ اراکین اسمبلی اور پارٹی عہدیداران کے ساتھ مل کر صحافیوں سے بات کرتے ہوئے یہ دعویٰ کیا تھا کہ عابد شیر علی تحریک انصاف کیساتھ مل گیا ہے اور صرف اپنے بھائی کو میئر بنوانے کے لئے دوبارہ بندے مروانے جیسی سازش تیار کی گئی ہے۔ لیگی ایم این اے میاں عبد المنان بھی پیچھے نہ رہے اور دعویٰ کیا کہ عابد شیر علی کا خاندان مسلم لیگ نواز کو یا تو چھوڑ رہا ہے یا انہیں پارٹی سے نکالا جا رہا ہے اور وہ کسی صورت کرپٹ افراد کو میئر بننے نہیں دیں گے شہر کی بلدیاتی سیاست کے دنوں میں دو گروپوں میں لڑائی کم ہونے کی بجائے مزید بڑھتی دکھائی دے رہی ہے اور سٹی تنظیم نے دو دن بعد اپنی ہی حکومت کے خلاف دھرنے کی کال دیدی ہے۔