فیصل آباد(نیوزڈیسک) یوم دفاع کی گولڈن جوبلی پر فیصل آباد کے ایک کاتب نے وطن عزیز پر 1965 کی جنگ میں جان قربان کرنے والے شہدا کو خراج عقیدت پیش کرنے کیلئے پاک فوج کے سب سے بڑے اعزاز نشان حیدر پر مکمل قرآن پاک تحریر کر ڈالا ۔اس انمول نشان حیدر کی لمبائی 40 جب کے چوڑائی 20 انچ ہے جس پر مکمل قرآن پاک لکھا ہوا ہے۔ پاک وطن کی محبت سے سرشار کاتب قمر سلطان کا کہنا ہے کے وہ یہ انمول نشان حیدر پاک فوج کے سپہ سالار کو پیش کرنا چاہتا ہے۔قمر سلطان نا صرف نشان حیدر پر بلکہ 28 مئی کے یوم تکبیر کی مناسبت سے 28 فٹ لمبے میزائل پر بھی پورا قران پاک تحریر کر چکا ہے جو دیکھنے میں میزائل لکھنے میں پینسل جب کے پڑھنے میں اللہ پاک کا کلام قران مجید ہے۔اسکے علاوہ کاتب قمر سلطان نے 14 اگست پر سال نو کی مناسبت سے قومی پرچم تیار کیا تھا جس پر 2015 مرتبہ کلمہ طیبہ تحریر تھا۔ ارض پاک پر جانوں کا نذرانہ پیش کرنے والے شہدا کو خراج عقیدت پیش کرنے کا یہ انداز اپنی مثال آپ ہے۔