اسلام آباد( نیوزڈیسک)تحریک انصاف لائرز ونگ نے الیکشن کمیشن کے چاروں ممبران کے خلاف ریفرنس کوریئر کے ذریعے سپریم جوڈیشل کونسل کو بھجوا دیئے ہیں ، الیکشن کمیشن کا کہنا ہے کہ سپریم جوڈیشل کونسل میں جانے کے بعد مستعفی ہونے کا سوال ہی پیدا نہیں ہوتا۔تفصیلات کے مطابق الیکشن ٹربیونل کے فیصلے کے بعد پی ٹی آئی پوری طرح کمر بستہ ہو کر میدان میں آ گئی ہے ، تحریک انصاف کے وکیل گوہر نواز سندھو کا کہنا ہے جوڈیشل کمیشن اور ٹریبونل کے فیصلوں کے بعد الیکشن کمیشن کے ممبران کے عہدوں پر رہنے کا کوئی جواز نہیں۔الیکشن
کمیشن کے چاروں ممبران کی تعیناتی میرٹ پر نہیں کی گئی ، وکیل تحریک انصاف کا کہنا تھا کہ الیکشن کمیشن کے چاروں ممبران کے خلاف ریفرنس سپریم جوڈیشل کونسل کو بھجوا دیا گیا ہے جس میں درخواست کی گئی ہے کہ سپریم جوڈیشل کونسل چاروں ممبران کو برطرف کر کے قانونی کاروائی کرے۔الیکشن کمیشن ارکان کا کہنا ہے عمران خان کے سپریم جوڈیشل کونسل جانے کے فیصلے کا خیر مقدم کرتے ہیں ، سپریم جوڈیشل کونسل میں عمران خان کے الزامات کا دفاع کرینگے ، الیکشن کمیشن ارکان نے کہا سپریم جوڈیشل کونسل میں جانے کے بعد مستعفی ہونے کا سوال ہی پیدا نہیں ہوتا۔