کراچی(نیوزڈیسک)کراچی کے علاقے گزری اور جمشید ٹائون میں پولیس اور رینجرز کے مشترکہ آپریشن کے نتیجے میں 30سے زائد افراد کو حراست میں لے لیا گیا ہے، جبکہ اسلحہ اور منشیات بھی برآمد کرلی گئی ہے۔ تفصیلات کے مطابق گزری کے علاقے میں واقع ٹی این ٹی کالونی میں پولیس کی جانب سے سرچ آپریشن کیا گیا، جس کے دوران گھر گھر تلاشی کے بعد 20سے زائد مشکوک افراد کو حراست میں لیا گیا۔ پولیس کا کہنا ہے کہ حراست میں لئے گئے افراد سے تفتیش جاری ہے، جس کے بعد بے گناہ ثابت ہونے والے افراد کو رہا کردیا جائے گا۔ ادھر جمشید ٹائون کے علاقے بلوچ پاڑہ میں پولیس اور رینجرز کی بھاری نفری نے جرائم پیشہ عناصر کی موجود گی کی اطلاع پر کارروائی کی، جس کے دوران 12سے زائد افراد کو حراست میں لے کر 3ٹی ٹی پستول، موٹر سائیکلیں اور منشیات برآمد کرلی۔ اس موقع پر پولیس کا کہنا تھا کہ جمشید ٹائون کے علاقے میں بھتہ خور لاشاری گروپ کی جانب سے بھتہ نہ دینے پر 2مرتبہ دستی بم سے حملہ کیا گیا، جوکہ خوش قسمتی پھٹ نہ سکا، ان ملزمان کی تلاش میں بھی چھاپے مارے گئے اور حراست میں لئے گئے ملزمان سے تفتیش جاری ہے۔