لاہور(اےن اےن آئی )گورنمنٹ سکیم کے عازمین حج کو گردن توڑ بخار اور انفلوئنزا کے حفاظتی ٹیکے لگانے اور پولیو کے قطرے پلانے کا کام آج بروز (سوموار ) سے ملک بھر میں واقع سات حاجی کیمپوں میں شروع ہو جائے گا -تمام عازمین کے لئے روانگی سے 10دن پہلے یہ ٹیکے لگوا لینا قانونی طور پر لازمی ہے -وزارت مذہبی امورنے حج انتظامات کے بارے میں شکایات کے فوری اندارج ‘ معلومات حاصل کرنے اور تجاویز پیش کرنے کے لئے خصوصی ٹیلی فون ہیلپ لائن اور ویب سائٹ قائم کر دی ہے‘تمام عازمین روانگی سے پہلے اور سعودی عرب میں قیام کے دوران معلومات‘ شکایات اور تجاویز کے لئے کسی بھی دن کسی بھی وقت اس ٹیلی فونک سہولت سے استفادہ کر سکتے ہیں -پاکستان میں کال کرنے کے لئے یو اے این نمبر042-111-725-425 ‘ سعودی عرب سے پاکستان کا ل کرنے کے لئے علیحدہ نمبر0092-42-35880054 اور سعودی عرب کے اندر ہی شکایات در ج کروانے کے لئے ٹال فری نمبر800-1166622 مختص کئے گئے ہیں ۔اس کے علاوہ حاجیوں کی شکایات کے آن لائن اندراج کے لئے ویب سائٹ www.cms.mora.gov.pkبھی بنائی گئی ہے اورشکایات کے اندراج اور جوابات معلوم کرنے کے لئے اینڈ ی رائیڈ ایپلی کیشن تیار کئے گئے ہیں ۔ وزارت مذہبی امور نے حج انتظامات شفافیت سے مکمل کرنے‘حج آپریشن کو جدید تقاضوں کے مطابق چلانے‘مختلف مراحل پر درپیش رکاوٹوں اور تاخیر کے خاتمے‘ سفر حج پر روانگی سے پہلے ہی عازمین حج کورہائشی عمارتوں میں کمروں کی الاٹمنٹ ‘ حج پروازوں کی بکنگ اور حج انتظامات کے بارے میں ان کی شکایات کے نہایت آسان طریقے سے اندراج کے لئے جامع انفارمیشن مینجمنٹ سسٹم تیار کر کئے ہیں ۔ یہ سسٹم دوران حج اپنے ساتھیوں سے بچھڑے جانے والے افراد کی تلاش ‘ سامان کی گمشدگی ‘قوانین اور پالیسیوں سے ناواقفیت اور حاجیوں کی صحت سے متعلقہ امور کے سلسلے میں پیش آنے والی مشکلات دور کرنے کے لئے مدد گار ثابت ہوں گے ۔ انفارمیشن مینجمنٹ سسٹم کے تحت عازمین حج کی آن لائن رجسٹریشن کی گئی ہے جس کے نتیجے میں ان کے کوائف کا تمام ڈیٹا فوری طور پر دستیاب ہوگا- ان تفصیلات کی روشنی میں ہر حاجی کی ضروریات کا تعین کیا گیا ہے تا کہ ان کے لئے ضروری سہولیات کا جلد از جلدانتظام اور ان کی فراہمی ممکن ہو سکے -وزارت مذہبی امور نے پرائیویٹ حج سکیم کے تحت درخواستیں جمع کروانے والے عازمین کو ہدایت کی ہے کہ وہ اپنے حج گروپ آرگنائزرز کے ساتھ کئے جانے والے معاہدے کی تفصیلات وزارت مذہبی امور کی ویب سائٹ www.hajjinfo.orgپر ضرور دیکھ لیں اور کسی غلطی کی صورت میں متعلقہ گروپ آرگنائزرز سے اس کی تصحیح بھی کروائیں۔ اس کے علاوہ اس معاہدے کی کاپی اپنے ہمراہ سعودی عرب بھی ضرور لے کر جائیں ۔ یہ تفصیل وزارت ِ مذہبی امور کی ویب سائٹ کے دائیں جانب پر ائیویٹ حجاج انفارمیشن حج2015ءپر کلک کر کے اپنا قومی شناختی نمبر یا پاسپورٹ نمبر داخل کر کے حاصل کی جاسکتی ہیں۔