ہری پور(نیوزڈیسک) پاکستان تحریک انصاف کے چیئرمین عمران خان کی اہلیہ ریحام خان نے کہا ہے کہ عمران خان نے آپ کیلئے کچھ نہ کیا تو گھر میں دھرنا ہو گا، عمران خان بیوی کی بات نہیں سنیں گے تو کس کی بات سنیںگے، عمران خان صرف اﷲ سے ڈرتے ہیں کسی کے آگے نہیں جھکتے، خیبرپختونخواہ کے پاس خان بھی ہیں اور جوان بھی ہیں اور بھابی بھی ہیں، ہری پورٹ کی عوام تحریک انصاف کے امیدوار کو جتوا کر بھابھی کو تحفہ دیں، عمران خان کو کبھی بھی مشورہ نہیں دوں گی کہ وہ فضل الرحمن کی درخو ا ست پر اسمبیل میں شریک ہوں۔ ان خیالات کا اظہار ریحام خان نے ہری پور میں تحریک انصاف کے امیدوار راجہ عامر زمان کے انتخابی جلسے سے خطاب اور میڈیا سے گفتگو کرتے ہوئے کیا۔ انہوں نے جلسے سے اردو پشتو اور ہندوکو تینوں زبانوں میں خطاب کیا۔ انہوں نے کہا کہ نوجوان کا مستقبل تحریک انصاف سے وابستہ ہے تحریک انصاف کی طاقت نوجوان ہیںانہیں خاموش نہ کیاجائے انہیں بولنے دیا جائے آپ لوگوں کی تعلیم کی ذمہ داری آپ کی بھابی کی ہے بتایا جائے کہ خیبرپختونخواہ کے علاوہ کس صوبے کے پاس بلدیاتی نظام ہے آپ لوگ تحریک انصاف کے امیدوار کو جتوائیں ‘ ظالموں قاتلوں اور پٹواریوں کو مسترد کریں۔ قبل ازیں ہری پور روانگی سے قبل بنی گالیہ میں میڈیا سے بات چیت کرتے ہوئے ریحام خان نے کہا ہے کہ عمران خان کو کبھی بھی مشورہ نہیں دوں گی کہ وہ مولانا فضل الرحمٰن کی درخواست پر اسمبلی اجلاس میں شریک ہوں، عمران خان کی بیوی ہو کر غلط مشورہ نہیں دے سکتی، این اے 19 میں پی ٹی آئی کے امیدوار میرے بھائی ہیں ان کی الیکشن مہم کیلئے آبائی گاؤں جا رہی ہوں۔ میڈیا اور اپنی ڈگری بارے اسکینڈل کے حوالے سے سوال کے جواب میں ریحام خان نے کہاکہ ٹی وی عمران خان کے کمرے میں ہے میرے کمرے میں ٹی وی نہیں ہے جب سے کام کرنا شروع کیا ہے میں نہ ہی پاکستانی چینلز دیکھتی ہوں اور نہ ہی کوئی اور چینل دیکھتی ہوں۔