لاہور(نیوز ڈیسک)سیلاب زدہ علاقوں میں فصلیں تباہ ہونے سے سبزی منڈیوں میں پھلوں اور سبزیوں کی قیمتیں آسمان سے باتیں کر رہی ہیں۔سندھ ،گلگت بلتستان ،چترال اور جنوبی پنجاب کے شہروں میں سیلاب نے پھلوں اور سبزیوں کی فصل کو تباہ کر دیا ہے راستے بند ہوئے تو ان علاقوں سے فروخت کے لئے دوسرے شہروں میں جانیوالے پھل اور سبزیاں بھی جانا بند ہو گئیں ہیں۔ سیلابی پانی کے باعث کوہ سلیمان کے قریب راستہ بند ہونے سے بلوچستان سے پنجاب کے لئے شہروں میں آنیوالا فروٹ بھی سبزی منڈیوں میں نہیں پہنچ رہا۔سندھ کے علاقوں سے سبزیوں کے ساتھ ساتھ پیاز اور ٹماٹر بھی پنجاب کے شہروں میں فروخت کے لئے لائے جاتے ہیں۔ گلگت بلتستان سے آڑو ،خوبانی اور آلو بخارا جبکہ جنوبی پنجاب سے آنیوالے آم تمام شہروں میں مشہور ہیں۔ بلوچستان کے علاقوں قلعہ عبدا للہ ،پشین اور لورا لائی سے سیب ،انگور اور گرما بھی پنجاب کی سبزی منڈیوں میں لایا جاتا ہے۔سیلابی صورتحال کے باعث ان علاقوں سے لائی جانے والی سبزیاں اور فروٹ نہ آنے سے سبزی منڈیوں میں ان اشیا ء کی قیمتوں میں اضافہ ہو گیا ہے۔سیلاب نے جہاں ہزاروں افراد کو بے گھر کیاوہیں پھلوں اور سبزی کی فصلوں کو بھی شدید نقصان پہنچا ہے سبزی منڈیوں میں پھلوں اور سبزیوں کی قلت پیدا ہونے سے قیمتیں آسمان کو چھو رہیں ہیں۔