کراچی(نیوز ڈیسک)لانڈھی میں مرغی خانے کے قریب پولیس وین پر دھماکے میں 10 اہلکار زخمی ہو گئے۔کراچی کے علاقے لانڈھی میں مرغی خانہ اسٹاپ کے قریب پولیس وین پر پلانٹڈ ڈیوائس کے ذریعے ڈھماکا کیا گیا جس کے نتیجے میں ایس ایس یو کے 10 اہلکار زخمی ہو گئے۔ دھماکا اتنا شدید تھا کہ اس کی آواز دور دور تک سنی گئی۔ امدادی ٹیموں کے اہلکاروں نے زخمیوں کو فوری طور جناح اسپتال منتقل کیا جہاں انہیں طبی امداد دی جارہی ہے۔ دوسری جانب جناح اسپتال کے سربراہ شعبہ ایمرجنسی کی انچارج ڈاکٹر سیمی جمالی کا کہنا ہے کہ اسپتال میں 10 پولیس اہلکاروں کو زخمی حالت میں لایا گیا ہے جن میں سے 2 کی حالت تشویشناک ہے تاہم اسپتال میں ایمرجنسی نافذ کر دی گئی ہے۔پولیس حکام کے مطابق دھماکا خیز مواد موٹر سائیکل میں نصب کیا گیا تھا جب کہ اس میں رزاق آباد پولیس ٹریننگ سنٹر کی بس کو اس وقت نشانہ بنایا گیا جب پولیس اہلکار ڈیوٹی پر شہر کی طرف آرہے تھے۔ قانون نافذ کرنے والے اداروں نے علاقے کا محاصرہ کر کے شواہد اکٹھے کرنا شروع کر دیئے ہیں۔