اسلام آباد (نیوز ڈیسک)سعودی عرب میں حکومتی ڈھانچے کے حوالے سے اہم فیصلے کرتے ہوئے تین نئے شاہی فرامین جاری کردیئے گئے ہیں۔
ان احکامات کے تحت وزرا کونسل کی تشکیل نو کے ساتھ دو اہم سرکاری اداروں کے سربراہان میں بھی تبدیلی کی گئی ہے۔سعودی سرکاری خبر رساں ادارے ایس پی اے کے مطابق خادم الحرمین الشریفین شاہ سلمان بن عبدالعزیز نے جمعرات کے روز یہ شاہی فرامین جاری کیے۔شاہی احکامات کے مطابق ولی عہد شہزادہ محمد بن سلمان کی سربراہی میں وزرا کونسل کی ازسرنو تشکیل کی گئی ہے، تاہم موجودہ تمام وزرا کو ان کے عہدوں پر برقرار رکھا گیا ہے۔ یہ اقدام کابینہ سے متعلق شاہی احکامات اور کابینہ قانون کے آرٹیکل 9 کے تحت مقررہ چار سالہ مدت مکمل ہونے کے بعد کیا گیا ہے۔
ایک اور شاہی فرمان کے تحت شہزادہ عبدالعزیز بن سلمان کو لوکل کنٹینٹ اینڈ گورنمنٹ پروکیورمنٹ اتھارٹی کے بورڈ کا چیئرمین مقرر کردیا گیا ہے، جبکہ اس منصب پر موجود بندر الخریف کو عہدے سے فارغ کردیا گیا۔دوسرے سرکاری ادارے میں بھی قیادت کی تبدیلی کی گئی ہے۔ شاہی فرمان کے مطابق مازن السدیری کو وزیر کے عہدے کے برابر رتبے کے ساتھ کیپیٹل مارکیٹ اتھارٹی کا نیا سربراہ مقرر کیا گیا ہے، جبکہ سابق چیئرمین محمد القویّز کو ذمہ داری سے سبکدوش کردیا گیا ہے۔یوں سعودی حکومت میں کابینہ کی تشکیل نو کے ساتھ دو اہم مالی و انتظامی اداروں کی قیادت بھی تبدیل کردی گئی ہے۔
