اسلام آباد (نیوز ڈ یسک) شرجیل انعام میمن نے انکشاف کیا ہے کہ گرفتار منشیات فروش خاتون انمول عرف پنکی کے نیٹ ورک میں شوبز انڈسٹری سے تعلق رکھنے والی چند معروف شخصیات بھی شامل ہیں، تاہم حکومت کسی بااثر فرد کو رعایت نہیں دے گی۔
سندھ اسمبلی میں خطاب کرتے ہوئے سینئر صوبائی وزیر نے کہا کہ قانون نافذ کرنے والے اداروں نے مسلسل محنت اور خفیہ کارروائیوں کے بعد انمول عرف پنکی کو گرفتار کیا، جبکہ اس کے پورے نیٹ ورک کے خلاف تحقیقات جاری ہیں۔انہوں نے کہا کہ حکومتِ سندھ نے صوبے سے منشیات کے خاتمے کو ترجیحی مشن قرار دیا ہے اور اس حوالے سے فریال تالپور کی زیر صدارت ہونے والے ایک اہم اجلاس میں منشیات فروشوں کے خلاف سخت اور بلاامتیاز کارروائی کا فیصلہ کیا گیا۔شرجیل میمن نے واضح کیا کہ اگر کسی بااثر شخصیت یا معروف اداکار کا تعلق اس نیٹ ورک سے ثابت ہوا تو اسے بھی قانون کا سامنا کرنا پڑے گا۔ ان کے مطابق منشیات فروشوں کی سرپرستی کرنے والوں کو کسی صورت نہیں بخشا جائے گا۔اسمبلی میں اپوزیشن کی جانب سے اراکین کے ڈرگ ٹیسٹ کے مطالبے پر ردعمل دیتے ہوئے انہوں نے کہا کہ اس حساس مسئلے پر سیاست نہیں ہونی چاہیے۔ ان کا کہنا تھا کہ اگر اپوزیشن چاہتی ہے تو تمام اراکین اسمبلی اپنے ٹیسٹ کروانے کیلئے تیار ہیں۔
انہوں نے اپوزیشن پر تنقید کرتے ہوئے کہا کہ ایسے معاملات کو سنجیدگی سے لینے کے بجائے سیاسی پوائنٹ اسکورنگ کی جا رہی ہے، جبکہ معاشرے میں منشیات کا مسئلہ خطرناک حد تک پھیل چکا ہے۔سینئر وزیر نے اس عزم کا اظہار بھی کیا کہ سندھ حکومت آئس، کوکین اور دیگر منشیات کے کاروبار کے مکمل خاتمے تک کارروائیاں جاری رکھے گی اور پورے نیٹ ورک کو قانون کے دائرے میں لایا جائے گا۔
