اسلام آباد (نیوز ڈیسک) وفاقی حکومت نے فیصلہ کیا ہے کہ بانی پی ٹی آئی اور سابق وزیراعظم عمران خان کو اڈیالہ جیل سے منتقل کرکے اسلام آباد کی نئی جیل میں رکھا جائے گا۔
اس سلسلے میں وفاقی وزیر داخلہ محسن نقوی نے زیر تعمیر اسلام آباد جیل اور اس سے ملحقہ ہاسٹل کا دورہ کیا اور تعمیراتی پیشرفت کا جائزہ لیا۔ اس موقع پر آئی جی اسلام آباد پولیس، چیف کمشنر، ڈی جی ایف آئی اے اور دیگر متعلقہ حکام بھی ان کے ہمراہ موجود تھے۔بعدازاں وزیر داخلہ نے اسلام آباد پولیس کی پاسنگ آؤٹ تقریب میں بطور مہمان خصوصی شرکت کی اور خطاب کرتے ہوئے کہا کہ وفاقی دارالحکومت کی پولیس کے لیے یہ اہم پیش رفت ہے۔ ان کے مطابق انسداد دہشت گردی کی خصوصی فورس پہلے موجود نہیں تھی، تاہم تین ماہ قبل شروع کیا گیا چھ ماہ کا تربیتی کورس دن رات محنت کے بعد نصف مدت میں مکمل کر لیا گیا۔ انہوں نے تربیت فراہم کرنے والے افسران کی کارکردگی کو سراہا اور بتایا کہ اسلام آباد کے ٹریننگ اداروں کو جدید بنانے کا عمل جاری ہے تاکہ مستقبل میں دیگر مقامات سے بھی اہلکار یہاں تربیت حاصل کر سکیں۔
وزیر داخلہ نے مزید کہا کہ نئی جیل کی تعمیر مکمل ہوتے ہی عمران خان کو وہاں منتقل کر دیا جائے گا، جو تقریباً دو ماہ میں تیار ہو جائے گی۔ ان کے بقول جیل میں طبی سہولتیں بھی میسر ہوں گی۔ انہوں نے وضاحت کی کہ چونکہ سزا اسلام آباد کی عدالت نے سنائی ہے، اس لیے قانونی تقاضوں کے مطابق انہیں اسی شہر کی جیل منتقل کیا جائے گا۔
