اسلام آباد (نیوز ڈیسک) — اورکزئی میں سیکیورٹی فورسز کے انٹیلیجنس بیسڈ آپریشن کے دوران لیفٹیننٹ کرنل، سیکنڈ ان کمانڈ میجر سمیت 11 جوان شہید ہوگئے، جب کہ جوابی کارروائی میں 19 دہشتگرد ہلاک کر دیے گئے۔
آئی ایس پی آر کے مطابق یہ کارروائی 7 اور 8 اکتوبر کی درمیانی شب کی گئی۔ آپریشن کے دوران فورسز اور دہشتگردوں کے درمیان شدید فائرنگ کا تبادلہ ہوا، جس میں لیفٹیننٹ کرنل جنید عارف اور میجر طیب راحت سمیت 11 اہلکاروں نے جامِ شہادت نوش کیا۔
آئی ایس پی آر نے بتایا کہ یہ آپریشن بھارتی سرپرستی میں سرگرم گروہ “فتنۃ الخوارج” کے ٹھکانے پر کیا گیا، جس میں 19 دہشتگرد مارے گئے۔
شہید ہونے والے دیگر اہلکاروں میں نائب صوبیدار اعظم گل، نائیک عدیل حسین، نائیک گل امیر، لانس نائیک شیر خان، لانس نائیک طالش فراز، لانس نائیک ارشاد حسین، سپاہی طفیل خان، سپاہی عاقب علی اور سپاہی محمد زاہد شامل ہیں۔
آئی ایس پی آر کے مطابق لیفٹیننٹ کرنل جنید عارف فرنٹ لائن پر اپنی ٹیم کی قیادت کر رہے تھے، جب کہ میجر طیب راحت نے بھی بہادری سے لڑتے ہوئے اپنی جان وطن پر قربان کی۔
بیان میں مزید کہا گیا کہ علاقے میں کلیئرنس آپریشن جاری ہے اور سیکیورٹی فورسز دہشتگردی کے مکمل خاتمے کے لیے پرعزم ہیں۔
فوجی ترجمان نے کہا کہ شہداء کی قربانیاں قوم کے حوصلے بلند کرتی ہیں اور یہ قربانیاں دہشتگردی کے خلاف جدوجہد کو مزید مضبوط بناتی ہیں۔
