اسلا آباد (نیوز ڈیسک ) اسرائیلی قید سے رہائی کے بعد سابق سینیٹر مشتاق احمد نے اپنا ویڈیو پیغام جاری کر دیا۔سوشل میڈیا پلیٹ فارم ایکس پر شیئر کیے گئے بیان میں انہوں نے بتایا کہ وہ اپنے 150 ساتھیوں کے ہمراہ اردن پہنچ چکے ہیں۔ مشتاق احمد کے مطابق انہیں پانچ دن تک اسرائیل کے صحرائی علاقے میں واقع بدنام زمانہ نیگیو ڈیزرٹ جیل میں رکھا گیا، جہاں قیدیوں کے ساتھ انتہائی سخت سلوک کیا گیا۔ان کا کہنا تھا کہ قید کے دوران ہاتھ پیچھے باندھ دیے گئے، آنکھوں پر پٹیاں چڑھا دی گئیں اور پاؤں میں بیڑیاں ڈال دی گئیں۔

انہوں نے مزید بتایا کہ قیدیوں پر کتے چھوڑے گئے، بندوقوں کا رخ ان کی جانب کیا گیا اور انہیں شدید تشدد کا نشانہ بنایا گیا۔ مشتاق احمد کے مطابق جیل میں ہوا، دوا اور پانی جیسی بنیادی سہولیات بھی دستیاب نہیں تھیں، جس کے خلاف انہوں نے اپنے ساتھیوں کے ساتھ تین دن تک بھوک ہڑتال کی۔اپنے پیغام میں مشتاق احمد نے کہا کہ فلسطین کی آزادی کی جدوجہد جاری رہے گی اور وہ غزہ کے عوام کی حمایت میں اپنی کوششیں جاری رکھیں گے۔ ان کا کہنا تھا کہ “ہم ظالموں کو انجام تک پہنچائیں گے اور اسرائیلی ناکہ بندی کو بار بار توڑیں گے۔”