لاہور( این این آئی) بانی پی ٹی آئی عمران خان کی ہمشیرہ علیمہ خان نے کہا ہے کہ عمران خان نے واضح کہا تھا کہ آپ چاہے میری پوری فیملی کو اٹھا لیں لیکن میں اپنے موقف سے پیچھے نہیں ہٹوں گا، ہم بھی عمران خان کے ساتھ کھڑے ہیں،جج صاحب نے بچوں کی ضمانت منظور کی یہ خوشی کی بات ہے لیکن جس طرح میرے بیٹوں کو اٹھایا گیا یہ افسوسناک ہے ۔
انسداد دہشتگردی کی خصوصی عدالت کے باہر میڈیا سے گفتگو کرتے ہوئے انہوں نے کہا کہ ہمارے تو بزرگوں کے بھی خفیہ ٹرائل کیے گئے اور حسان نیازی سمیت دیگر کارکنان کو سزائیں دی گئیں، حسان نیازی کو تو اپیل کا حق بھی نہیں دیا گیا۔ انہوں نے کہا کہ عمران خان اس وقت صرف القادر ٹرسٹ میں گرفتار ہیں۔صحافی کے اس سوال کے کہ شیر افضل مروت نے کہا ہے کہ بیرون ملک جتنے سوشل میڈیا اکائونٹس چل رہے ہیں ان کے پیچھے علیمہ کے بیٹے ہیںکا جواب دیتے ہوئے علیمہ خان نے کہا کہ اس طرح کے بندوں کو اسٹیبلشمنٹ اور ایجنسیاں استعمال کر کے چھوڑ دیتی ہیں پھر ان کو کوئی پوچھتا نہیں تو ان کا یہ حال ہو جاتا ہے،عمران خان نے تو اس کو پہلے ہی پارٹی سے نکال دیا ہے اب وہ کسی اور پارٹی میں چلے جائیں ۔
