اسلام آباد (نیوز ڈیسک) لاہور کے علاقے والٹن، برکی روڈ اور ڈیفنس میں جمعرات کے روز اچانک شدید فائرنگ اور دھماکوں جیسی آوازوں نے شہریوں کو خوفزدہ کر دیا۔ کئی مقامات پر سائرن بھی بجنے لگے، جس پر لوگ گھبرا کر گھروں سے باہر نکل آئے۔
ابتدائی طور پر فائرنگ اور دھماکوں کی وجوہات واضح نہیں ہو سکیں، تاہم نجی ٹی وی ’’ایکسپریس نیوز‘‘ کے مطابق یہ آوازیں ممکنہ طور پر سیکیورٹی اداروں کی جاری فرضی مشقوں کا حصہ تھیں۔ ابھی تک اس حوالے سے کسی سرکاری ادارے کی طرف سے باضابطہ بیان سامنے نہیں آیا۔
ادھر ’’ایکسپوز پراپیگنڈا‘‘ نامی سوشل میڈیا اکاؤنٹ نے ایک ویڈیو شیئر کرتے ہوئے وضاحت دی کہ لاہور سے تعلق رکھنے والے متعدد افراد ان آوازوں سے پریشان ہو گئے تھے، لیکن حقیقت میں یہ تمام سرگرمیاں ٹیسٹنگ یا مشقوں کا نتیجہ تھیں، اس لیے خوفزدہ ہونے کی کوئی ضرورت نہیں۔
دوسری طرف ’’جیو نیوز‘‘ نے رپورٹ کیا ہے کہ بھارت کی جانب سے پاکستان کے مختلف علاقوں میں ڈرونز کے ذریعے مداخلت کی کوشش کی گئی، جسے پاک فوج نے بروقت کارروائی کرتے ہوئے ناکام بنا دیا۔ اسی تناظر میں والٹن، برکی اور ڈیفنس جیسے علاقوں میں سیکیورٹی مزید سخت کی گئی، اور سائرن بجائے گئے۔
مقامی ذرائع کا کہنا ہے کہ والٹن کے اطراف میں جاری فرضی مشقوں کے دوران ہی دھماکوں اور فائرنگ کی آوازیں سنائی دیں، جنہیں شہریوں نے حقیقی حملہ سمجھ کر تشویش کا اظہار کیا۔
