راولپنڈی (این این آئی) بانی پی ٹی آئی کی ہمشیرہ علیمہ خان نے بتایا ہے کہ عمران خان نے کہا ہے کہ حکومت کا کمیشن بنانے کا ارادہ نہیں، (آج) سے ترسیلات زر نہ بھیجنے کی کال پرعمل کیا جائے۔ اڈیالہ جیل کے باہر میڈیا سے گفتگو کرتے ہوئے علیمہ خان نے کہا کہ جب یہاں سے سزا ہوتی ہے تو ہائی کورٹ سے ریلیف مل جاتا ہے، القادر ٹرسٹ کا کیس ہائی کورٹ جائے گا جس میں 6مہینے لگ سکتے ہیں، اگلے تین سے چار مہینے تو بانی پی ٹی آئی پکے جیل میں رہیں گے۔

علیمہ خان نے کہا کہ جو 26 نومبر کو احتجاج میں گرفتار ہوئے ان پر مزید مقدمات بنائے جارہے ہیں۔ انہوں نے کہا کہ بانی پی ٹی آئی کے دو مطالبات ہیں، 9مئی اور 26نومبر پر جوڈیشل کمیشن بنایا جائے لیکن حکومت کی نیت نہیں کہ لوگوں کو رہا کیا جائے۔انہوں نے کہا کہ بانی پی ٹی آئی نے حکومت کا کمیشن بنانے کا ارادہ نہیں ہے، (آج) سے ترسیلات زر نہ بھیجنے کی کال پر عمل شروع کردیا جائے۔علیمہ خان نے کہا کہ اگر 2مطالبات مان لئے گئے تو زر مبادلہ نہ بھیجنے کی کال واپس لے لیں گے۔