ا سلام آباد (این این آئی)اسلام آباد ہائی کورٹ نے ڈپٹی کمشنر اسلام آباد کو 3 ایم پی او کے اختیارات استعمال کرنے سے تا حکمِ ثانی روک دیا۔دورانِ سماعت عدالتِ عالیہ نے استفسار کیا کہ ڈپٹی کمشنر بطور ڈسٹرکٹ مجسٹریٹ کس اختیار کے تحت ایم پی او آرڈرز جاری کر رہے ہیں؟اس موقع پر لا افسر نے ملٹری ڈکٹیٹر دور کا 1965 کا نوٹیفکیشن اسلام آباد ہائی کورٹ کے سامنے پیش کر دیا۔
اسلام آباد ہائی کورٹ نے اسٹیٹ کونسل کا جواب غیر تسلی بخش قرار دے دیا اور معاونت کے لیے اٹارنی جنرل کو نوٹس جاری کر دیا۔عدالت نے ڈی سی اسلام آباد کو حکم دیا کہ آئندہ سماعت تک آپ ایم پی او کا کوئی آرڈر پاس نہیں کریں گے۔جسٹس بابر ستار نے ان سے سوال کیا کہ ڈپٹی کمشنر صاحب آپ سمجھ رہے ہیں ناں؟عدالت نے پی ٹی آئی رہنما شہر یار آفریدی اور شاندانہ گلزار کو کسی بھی کیس میں گرفتار نہ کرنے کے حکم میں بھی توسیع کر دی۔
