اسلام آباد(نیوز ڈیسک)اسلام آباد ہائیکورٹ نے تھری ایم پی او کے تحت نظر بندی معطل کرتے ہوئے نائب صدر پاکستان تحریک انصاف پرویز الٰہی کو رہا کرنے کا حکم دیا، عدالت نے سابق وزیر اعلٰی پنجاب کو منگل کے روز دوبارہ پیش ہونے کی ہدایت کرتے ہوئے کسی بھی قسم کا بیان دینے سے بھی روک دیا۔اسلام آباد ہائیکورٹ میں سماعت کے دوران جسٹس طارق جہانگیری نے استفسار کرتے ہوئے کہاکہ ‏چوہدری پرویز الٰہی کو پہلی بار کب گرفتار کیا گیا تھا؟ جس پر وکیل نے بتایا کہ ‏یکم جون کو گرفتار کیا گیا تھا۔

‏جسٹس طارق جہانگیری نے کہاکہ اس کا مطلب ہے پرویز الٰہی 3 ماہ سے زائد عرصے سے حراست میں ہیں۔اسلام آباد ہائیکورٹ نے ڈی سی اسلام آباد کو منگل کے لیے نوٹس جاری کردیا، ساتھ ہی پرویز الٰہی کو بھی پیش ہونے کی ہدایت کردی۔تاہم عدالت نے آئندہ سماعت تک پرویز الٰہی کو کوئی بھی بیان دینے سے روک دیا۔