اسلام آباد(این این آئی) پاکستان مسلم لیگ (ن) نے حکومت کی جانب سے موجودہ قانون سازی کو آئین اور قانون کے ساتھ کھلواڑ قرار دیتے ہوئے کہاہے کہ یہ ایک غیر جانبدار اور آزاد الیکشن کمیشن پر حملہ ہے ،الیکشن کمیشن کے آئینی اختیارات پہ کوئی سمجھوتہ نہیں کریں گے ۔
بدھ کو پاکستان مسلم لیگ (ن) کی ترجمان مریم اورنگزیب نے پارلیمنٹ کے مشترکہ اجلاس کے حوالے سے اپنے بیان میں کہاکہ ڈسکہ الیکش چور عمران صاحب اگلے الیکشن پہ ڈاکہ ڈالنے کی قانون سازی بلڈوز کر رہے ہیں ،موجودہ قانون سازی آئین اور قانون کے ساتھ کھلواڑ ہے ،قانون سازی ماورائے آئین ہے ۔ انہوںنے کہاکہ الیکشن کمیشن کے آئینی اختیارات پہ کوئی سمجھوتہ نہیں کریں گے ،یہ ایک غیر جانبدار اور آزاد الیکشن کمیشن پر حملہ ہے ۔ انہوںنے کہاکہ یہ انتخابی اصلاحات نہیں بلکہ عوام کی رائے کے قتل کے سازش اور منصوبہ بندی ہے ۔انہوںنے کہاکہ انتخابی اصلاحات سازش ، دھونس اور دھمکی سے نہیں بلکہ پارلیمانی مشاورت سے ہوتی ہیں۔انہوںنے کہاکہ یہ انتخابی اصلاحات کی قانون سازی نہیں بلکہ سلیکٹڈ عمران صاحب کا الیکشن چوری کا منصوبہ ہے،انشاء اللہ ایوان کے دونوں اطراف عوامی نمائندے عوام کی رائے کا قتل نہیں ہونے دیں گے۔ انہوںنے کہاکہ یہ الیکٹرانک ووٹنگ مشین نہیں عوام کے ووٹ چوری کی تاریخی اور بد ترین مثال ہے۔ انہوںنے کہاکہ عمران صاحب کو پتہ ہے کہ عوام نے آٹا چینی بجلی گیس دوائی چوروں کو ووٹ نہیں دینا ۔ مریم اور نگزیب نے کہاکہ پہلے اٹھارویں ترمیم نشانہ تھی، اب پورا آئین کی نشانے پر ہے ،آئین عوام کو آزادی، حقوق، وسائل میں حصہ دیتا ہے، اس کے نہ ہونے سے حادثے ہوئے ،عوام کا حق انتخاب چھیننا عملا آئین کو دفن کرنا ہے ۔انہوںنے کہاکہ تین سال سے پاکستان کی عوام الیکشن چوری کا خمیازہ بھگت رہی ہے ،تین سال سے پاکستان کے عوام الیکشن چوری کی وجہ سے مہنگائی ، بے روزگاری اور معاشی تباہی کی چکی میں پس رہے ہیں۔
