اسلام آباد(آن لائن) وزیراعظم عمران خان نے کہا ہے کہ ہماری حکومت نے ایک مذہبی جماعت کے خلاف اسوقت انسداد دہشتگردی قانون کے تحت کارروائی کی جب تنظیم نے ریاست کی رٹ کو چیلنج کیا۔ اپنے ٹویٹ میں عمران خان نے کہا کہ وہ اندرون اور بیرون ملک اپنے لوگوں پر یہ
واضع کر دینا چاہتے ہیں کہ مذہبی جماعت کے خلاف کارروائی اسکی جانب سے ریاستی رٹ کو چیلنج کرنے پر کی گئی، سٹریٹ وائیلنس اور لوگوں اور قانون نافذ کرنیوالوں پر حملے کئے گئے ۔ انہوں نے کہا کوئی بھی آئین و قانون سے بالا نہیں یہ سب کو معلوم ہونا چاہیے ۔وزیراعظم نے اپنے ٹوئٹ میں کہا کہ ان کا بیرون ملک انتہا پسندوں کو پیغام ہے جو کہ اسلام فوبیا میں ملوث ہیں کہ ان کی اسلام فوبیا کی وجہ سے پوری دنیا میں ایک ارب 30 کروڑ مسلمانوں کے جذبات کو ٹھیس پہنچتی ہے ہم مسلمان حضور نبی کریمۖ کے لئے سب سے زیادہ محبت رکھتے ہیں اور حضورۖ ہمارے دلوں میں رہتے ہیں ہم ان کی شان میں کسی قسم کی گستاخی اور بے ادبی برداشت نہیں کر سکتے ،وزیر اعظم نے مغربی حکومتوں پر بھی زور دیا کہ جس طرح وہ ہولو کاسٹ پر منفی کمنٹ کرنا پسند کرتے ہیں یہی معیار ان لوگوں کے لئے بھی اختیار کریں جو کہ جان بوجھ کر نبی کریمۖ کی شان میں گستاخی کرتے ہیں اور مسلمانوں کے خلاف نفرت پھیلاتے ہیں ،مغرب میں رہنے والے وہ عناصر انتہا پسند سیاستدان وہ ایسی بے ادبی اور نفرت میں ملوث ہیں اور اس کے لئے آزادی اظہار کا سہارا لیتے ہیں وہ اخلاقی قدروں سے مکمل طور پر عاری ہیں ان میں حوصلہ نہیں کہ وہ ایک ارب 30 کروڑ مسلمانوں کو ان کے جذبات کو ٹھیس پہنچانے پر معافی مانگے،ہمارا مطالبہ ہے کہ یہ انتہا پسند معافی مانگیں۔
