اسلام آباد(مانیٹرنگ ڈیسک)ن لیگ کے مرکزی سیکرٹری جنرل احسن اقبال نے اس امر کی سختی سے تردید کی ہے کہ پارٹی قائدنواز شریف ان سے ناراض ہیں۔ قومی روزنامے کے مطابق احسن اقبال نے
کہاکہ اس بات میں کوئی صداقت نہیں ہے کہ انہوں نے خواجہ آصف اور رانا تنویر حسین کے ہمراہ اسٹیبلشمنٹ کے کسی نمائندے سے ملاقات کی اور لاہور میں انہوں نے سابق وزیراعظم نواز شریف کی اجازت کے بغیر نیب کی زیرحراست شہباز شریف سے ملاقات کی۔ ان کاکہناتھاکہ یہ سب من گھڑت سٹوری ہے۔واضح رہے کہ اس سے قبل وزیراعظم کے معاون خصوصی شہزاد اکبر نے حال ہی میں کہا تھا کہ جس وقت شہباز شریف نیب کی حراست میں تھے اس وقت ن لیگ کے تین رہنمائوں نے ان سے ملاقات کی تھی اور میڈیا کے کچھ مبصرین نے اشارہ دیا تھا کہ نواز شریف نون لیگ کے ان رہنمائوں سے ناراض ہیں جنہوں نے نیب کی جیل میں شہباز شریف سے ملاقات کی تھی۔ باخبر ذرائع کا کہنا ہے کہ نواز شریف اس لئے ناراض تھے کہ ان تین رہنمائوں نے فوجی اسٹیبلشمنٹ کے سینئر نمائندے کی درخواست پر شہباز شریف سے ملاقات کی تھی۔ یہ تین رہنما خواجہ آصف، احسن اقبال اور رانا تنویر حسین تھے۔
