اسلام آباد(مانیٹرنگ ڈیسک)تحریک انصاف کے ایم این اے میجر ریٹائرڈ طاہرصادق نے اپنی ہی حکومت پرتنقید کرتے ہوئے کہا کہ ملک میں مہنگائی کنٹرول سے باہر ہو گئی، غریب عوام کا کوئی پرسان حال نہیں، نااہل انتظامیہ مسلط ہے ۔

روزنامہ 92کے مطابق حلقہ این اے 55 اٹک سے پی ٹی آئی کے ایم این اے میجر(ر)طاہرصادق نے پریس کانفرنس کرتے ہوئے اپنی ہی حکومت پر برس پڑے ۔ انہوں نے کہا کہ موجودہ حکومت کی 2 سالہ پالیسی مایوس کن ہے ، انتظامیہ کی کارکردگی صرف فوٹو سیشن اوروٹس ایپ گروپ تک محدود ہے ِ۔ قیام پاکستان سے لے آج تک اتنی کرپشن نہیں ہوئی جتنی موجودہ دورمیں ہے ِ، ٹائیگرفورس کی اداروں میں کوئی شنوائی نہیں۔ انہوں نے کہا کہ عوام کے پاس روٹی کھانے اورپانی جیسی اہم ضرورت کے پیسے بھی نہیں۔ وزیراعظم کو نظام درست کرنے کیلئے اپنے اِردگرد دیکھنا چا ہئے ۔ عوام نے ووٹ تبدیلی کے لئے دیا ہے ، ملک میں بہتری لائیں۔موجودہ حکومت نے بلدیاتی نظام لولالنگڑا بنادیا، 10 ارب کے بجائے صرف 3 کروڑ 25 لاکھ درخت لگائے گئے ہیں۔ لا اینڈ آرڈر کی صورتحال انتہائی ابترہے ۔