اسلام آباد ( آن لائن)عالمی بینک میں پاکستان کی جانب سے ایگزیکٹو ڈائریکٹر کی تعیناتی کے لیے سمری سرکولیٹ کیے بغیر ہی وزیراعظم عمران خان کو چار ناموں کی فہرست بھجوا دی گئی۔ بتایا گیا ہے کہ حکومت کی جانب سے عالمی بینک میں ایگزیکٹو ڈائریکٹر کے عہدے کے لیے مختلف ناموں پر غور کیا گیا جس کے بعد سمری مشتہر کیے بغیر وزیراعظم عمران خان کو 4 نام بھجوا دیے گئے۔
ایگزیکٹو ڈائریکٹر کی تعیناتی کے لیے وزیراعظم کے پرنسپل سیکرٹری اعظم خان کا نام سرفہرست ہے جبکہ دیگر 3 امیدواروں میں سیکرٹری خزانہ نوید کامران بلوچ، سیکرٹری اسٹیبلشمنٹ ڈویژن اعجاز منیر اور ریٹائرڈ افسر طارق باجوہ کے نام شامل ہیں۔ ذرائع نے بتایا کہ عالمی بینک میں ایگزیکٹو ڈائریکٹر کے عہدے کیلئے بیورو کریسی میں سینئر افسران متحرک ہوگئے، اعظم خان نے شیر باد حاصل کرنے کیلئے حکومت کے سینئر رہنمائوں سے رابطے کئے ہیں ۔ذرائع نے بتایا کہ طارق باجوہ سیکرٹری خزانہ، چیئرمین ایف بی آر اور گورنر اسٹیٹ بینک رہ چکے ہیں اور معیار کے لحاظ سے سرفہرست ہیں مگروزیر اعظم کو بھجوائی گئی سمری میں ان کا نام سب سے آخر میں رکھا گیا ہے۔ ایگزیکٹو ڈائریکٹر ورلڈ بینک کی تعیناتی کی سمری گریڈ 22 کے آفیشلز میں مشتہر کی جاتی ہے تاہم اس حوالے سے کسی قسم کی سمری سرکولیٹ ہی نہیں کی گئی۔ترجمان وزارت اقتصادی امور کا کہنا تھا کہ ایگزیکٹو ڈائریکٹر ورلڈ بینک کی تعیناتی کے لیے سمری وزیراعظم کوبھجوائی جا چکی ہے، سمری میں تجویز کردہ نام ظاہر نہیں کیے جا سکتے۔ یاد رہے عالمی بینک میں پاکستان کے نامزد ایگزیکٹو ڈائریکٹر اکتوبر میں ریٹائر ہو رہے ہیں، پاکستان نے اکتوبر تک گریڈ 22 کے حاضر سروس یا ریٹائرڈ افسر کو ایگزیکٹو ڈائریکٹر نامزد کرنا ہے ۔
