راولپنڈی(آن لائن)عسکری قیادت نے ایک مرتبہ پھر واضح کیا ہے کہ پاکستان کی سلامتی کو درپیش کسی بھی خطرے کا بھرپور انداز میں جواب دیا جائے گا۔آئی ایس پی آر کے مطابق آرمی چیف جنرل قمر جاوید باجوہ کی زیر صدارت 233ویں کور کمانڈر کانفرنس منگل کو جی ایچ کیو میں منعقد ہوئی۔

کانفرنس میں ملک کی خارجی وداخلی سلامتی کے تناظر میں آپریشنل تیاریوںاور درپیش خطرات کی نوعیت کا جائزہ لیا گیا۔ آرمی چیف نے تمام فارمیشنز کی کوششوں کی تعریف کی اور بالخصوص علاقائی سلامتی صورتحال کے تناظر میں اعلیٰ سطح کی تیاریوں کو برقرار رکھنے کی کوششوں کو سراہا۔ کور کمانڈرز کانفرنس میں مقبوضہ کشمیر میں جاری بھارتی مظالم کا خاص طور پر جائزہ لیا جہاں 5اگست2019ء کے بھارتی غیر قانونی اقدامات کو آئندہ ماہ ایک سال کا عرصہ مکمل ہورہا ہے اور بہادر کشمیری عوام کی آزادی کے حصول کیلئے ان کی قانونی جدوجہد کو خراج تحسین پیش کیا گیا۔آرمی چیف نے کووڈ 19اور ٹڈی دل کے خلاف جنگ میں سول انتظامیہ کی مدد میں کاوشوں کو خصوصی طور پر سراہا اور یہ بات زور دے کر کہی کہ عیدالاضحی اور محرم الحرام کے موقع پر زیادہ سے زیادہ احتیاط کی ضرورت ہے تاکہ وباء پر قابو پانے کیلئے حاصل ہونے والی کامیابیوں کو برقرار کھا جاسکے ۔ کانفرنس میں ملک بھر کے ڈاکٹرز ،ہیلتھ ورکرز،پیرامیڈیکس سٹاف کی کوششوں کو بھی سراہا گیا ۔آرمی چیف نے مسلح افواج کی مجموعی آپریشنل تیاریوں پر مکمل اطمینان کا اظہار کیا۔فورم نے اس عزم کو دہرایا کہ پاکستان کی سلامتی کو درپیش کسی بھی خطرے کا بھرپور انداز میں جواب دیا جائے گا۔

موضوعات:آرمی چیف قمر جاوید باجوہ