اسلام آباد(مانیٹرنگ ڈیسک)خانہ کعبہ میں کرونا وائرس سے بچائو کے تمام انتظامات مکمل ، امام کعبہ شیخ عبدالرحمن السدیس نے انتظامات کا جائزہ لیا، ذرائع کے مطابق 20یا 22رمضان المبارک کو خانہ کعبہ کو عام زائرین کیلئے کھول دیا جائیگا۔
اس سے پہلے حرمین شریفین کی جنرل پریزیڈنسی کی جانب سے خانہ کعبہ کو جراثیم سے پاک کرنے، اللہ کے گھر کی سینیٹائزنگ اور اس کی تطہیر کی گئی۔ خانہ کعبہ کی تطہیر اور سینی ٹائزنگ کے لیے شاہ عبدالعزیز غلافہ کعنہ کمپلیکس کی طرف سے خصوصی تکنیکی ٹیم بلائی گئی تھی۔ میڈیارپورٹس کے مطابق اس ٹیم نے نہایت مہارت اور احتیاط کے ساتھ سالانہ شیڈول کے مطابق خانہ کعبہ کی تطہیر کا عمل مکمل کیا۔ خانہ کعبہ کا غلاف تیار کرنے والے ادارے کی ٹیم کو حرمین شریفین جنرل پریزیڈنسی کی طرف سے مقدس مقام کی تطہیر کےلیے جدید آلات اور تمام ضروری لوازمات فراہم کیے گئے تھے۔خیال رہے کہ خانہ کعبہ کی تطہیر کا عمل ایک ایسے وقت میں مکمل کیا گیا ہے جب ماہ صیام کا بابرکت مہینہ عالم اسلام پر سایہ فگن ہونے کے ساتھ ساتھ اس وقت پوری مسلم دنیا کرونا جیسی ایک خطرناک وبا سے گذر رہی ہے۔امام کعبہ اور حرمین پریزنڈنسی کے ڈائریکٹر الشیخ ڈاکٹر عبدالرحمان السدیس کا کہناتھا کہ خانہ کعبہ، مسجد حرام اور مسجد نبوی میں صفائی اور ستھرائی کا کام کرنے والوں ہرممکن سروسز فراہم کریں گے۔
