اسلام آباد(این این آئی)وزیر اعظم عمران خان نے اقوام متحدہ کی جنرل اسمبلی میں اپنے خطاب کا آغاز بسم اللہ الرحمان الرحیم اور سورۃ فاتحہ کی آیت اِیاک نعبد و اِیاک نستعِین(جس کا ترجمہ ہے اللہ ہم تیری عبادت کرتے ہیں اور تجھ سے ہی مدد مانگتے ہیں)سے کیا۔وزیرا عظم عمران خان نے اقوام متحدہ کی جنرل اسمبلی میں 49منٹ تک فی البدیع انگریزی میں خطاب کیا۔

وزیرا عظم عمران خان نے جنرل اسمبلی سے اپنے خطاب کاآغاز7بجکر 50منٹ اور اختتام 8بجکر 39منٹ پر کیا۔  وزیر اعظم عمران خان نے اقوا م متحدہ کی جنرل اسمبلی میں خطاب کے دوران قومی لباس شلوار قمیض زیب تن کیا۔ وزیر اعظم نے لائٹ بلیو رنگ کی شلوار قمیض اور اس کے اوپر کوٹ پہن رکھا تھا۔وزیراعظم عمران خان نے عالمی برادری کو کشمیریوں کو حق خود ارادیت دلانے کیلئے بھرپور کردار ادا کرنے کا مطالبہ کرتے ہوئے خبردار کیا ہے کہ مسئلہ کشمیر پر عالمی برادری نے مداخلت نہ کی تو دو ایٹمی ممالک آمنے سامنے ہونگے،اگر بھارت نے کچھ غلط کیا تو ہم آخر تک لڑیں گے اور نتائج سوچ سے کہیں زیادہ ہوں گے،، مقبوضہ کشمیر میں 52 روز سے 80 لاکھ افراد 9 لاکھ فوج کی موجودگی میں محصور ہیں اور آرایس ایس کے رکن نریندر مودی کی حکومت ان سے جانوروں جیسا سلوک کر رہی ہے، دنیا اس معاملے پر کیوں خاموش ہے؟ اگرآٹھ ہزار یہودی اس طرح اتنے دنوں سے محصور ہوتے تو کیا ہوگا؟،مقبوضہ کشمیر میں جب کرفیو ہٹالیا جائیگا اور لوگ باہر آئیں گے جہاں 9 لاکھ فوجی تعینات ہیں اس صورت میں خون ریزی کا خطرہ ہے،یہ وقت عملی اقدم اٹھانے اور اقوام متحدہ کی آزمائش کا وقت ہے سب سے پہلے بھارت فوری طور پر کشمیر میں گزشتہ 55 روز سے نافذ کرفیو ختم، 13 ہزار کشمیریوں کو رہا کرے،بھارت کے ساتھ باہمی مسائل پر بات کرنے کیلئے تیار تھے، مودی نے کوئی جواب نہیں دیا،پاکستان میں کوئی شدت پسند تنظیم نہیں، بھارت ہم پر الزام لگا رہا ہے، بھارتی سرزمین سے ہمارے بلوچستان میں حملے کیے جا رہے ہیں جس کا ثبوت بھارتی جاسوس کلبھوشن یادو کی گرفتاری ہے