اسلام آباد (این این آئی)وزیراعظم عمران خان نے ایک بار پھر کشمیریوں سے اظہار یکجہتی کیلئے عوام سے کل آدھے گھنٹے کیلئے باہر نکلنے کی اپیل کرتے ہوئے کہا ہے کہ کشمیر کی ڈیموگرافی تبدیل کرنے کا منصوبہ چوتھے جنیوا کنونشن کے تحت جنگی جرم ہے۔
ہمیں اہلِ کشمیر کو ٹھوس پیغام بھجوانا ہے کہ بحیثیت قوم ہم پوری قوت سے ان کی پشت پر ہیں۔ جمعرات کو ٹوئٹر پر جاری بیان میں وزیراعظم عمران خان نے کہا کہ میں چاہتا ہوں کہ تمام پاکستانی کشمیری عوام سے یکجہتی کے اظہار اور مقبوضہ کشمیر کے لوگوں کو واضح پیغام بجھوانے کیلئے کہ پوری پاکستانی قوم ان کے ساتھ کھڑی ہے، جمعہ کو دن 12 بجے سے لے کر 12:30 تک باہر نکلیں۔انہوں نے کہا کہ کشمیر کی ڈیموگرافی تبدیل کرنے کا منصوبہ چوتھے جنیوا کنونشن کے تحت جنگی جرم ہے، ہمیں اہل کشمیر کو ٹھوس پیغام بھجوانا ہے کہ بحیثیت قوم ہم پوری قوت سے ان کی پشت پر ہیں۔وزیراعظم نے کہاکہ چنانچہ تمام پاکستانی سب کچھ چھوڑ چھاڑ کر جمعہ کو آدھے گھنٹے کیلئے باہر نکلیں اور اہلِ کشمیر کے ساتھ اظہار یکجہتی کریں۔انہوں نے کہا کہ جمعہ کو باہر نکل کر ہم کشمیری بھائیوں کو پیغام دیں گے کہ پوری پاکستانی قوم بھارتی سفاکیت، 24 روز سے جاری غیر انسانی کرفیو، بچوں، خواتین سمیت کشمیری باشندوں پر تشدد، ان کے قتل ، مودی سرکار کے نسل کشی کے ایجنڈے اور مقبوضہ کشمیر پر غیر قانونی قبضے کے خلاف کھڑی ہے۔
