اسلام آباد(مانیٹرنگ ڈیسک)اعلیٰ عدلیہ کے خلاف اشتعال انگیز انٹرویو کے کیس میں سابق سینیٹر فیصل رضا عابدی باعزت بری،نجی ٹی وی کے مطابق انسداد دہشت گردی عدالت نے سابق سینیٹر فیصل رضا عابدی کے خلاف درخواست پر محفوظ فیصلہ سنا دیا جس میں ان سمیت دیگر شریک ملزمان کو بری کردیاگیا۔واضح رہے فیصل رضا عابدی نے ایک ویب ٹی وی چینل کے پروگرام کے دوران عدلیہ اور اس وقت کے چیف جسٹس ثاقب نثار
کے خلاف نازیبا زبان استعمال کی تھی۔ستمبر 2018 میں چیف جسٹس نے معاملے کا از خود نوٹس لیا اور کیس سپریم کورٹ کے دوسرے بینچ کو بھجوا دیا، بعد ازاں پولیس کی جانب سے فیصل رضا عابدی کے خلاف انسداد دہشت گردی ایکٹ سمیت دیگر دفعات کے تحت مقدمہ درج کیا گیا تھا۔یاد رہے انسداد سائبر کرائم عدالت نے 18اپریل کوعدلیہ مخالف بیانات کیس میں فیصل رضا عابدی پر فرد جرم عائد کی تھی تاہم ملزم نے صحت جرم سے انکار کیا ۔
