تونسہ شریف (سی پی پی ) وزیر اعلیٰ پنجاب سردار عثمان خان بزدار کے والد سابق ممبر پنجاب اسمبلی بزدار قبیلہ کے چیف فتح محمدخان بزدار نے کہا ہے کہ عمران خان نے میرے بیٹے عثمان خان بزدار کو وزیر اعلیٰ پنجاب بنوا کر تاریخ ساز فیصلہ کیا، سردار عثمان پنجاب خصوصاً جنوبی پنجاب کی ترقی و خوشحالی میں اہم کردار ادا کریں گے۔میڈیا سے گفتگو کرتے ہوئے انہوں نے کہاکہ ن لیگ اورپیپلز پارٹی کی سابقہ حکومتوں کے
دور میں ہمارے پسماندہ علاقے کو نظر انداز کیا گیا، یہی وجہ ہے کہ الیکشن میں جنوبی پنجاب کے عوام نے دونوں جماعتوں کو مسترد کر کے پی ٹی آئی کو بھاری اکثریت سے کامیابی دلائی اور عمران خان کی قیادت پر مکمل اعتماد کیا۔انہوں نے کہاکہ عمران خان کا مشکور ہوں اورمجھے خوشی ہے کہ پی ٹی آئی کی قیادت نے اپنے منشور کے مطابق ایک پسماندہ علاقے سے وزیراعلیٰ پنجاب کا انتخاب کیا اور اسے وزیراعلیٰ پنجاب منتخب کروایا۔
