راولپنڈی ( مانیٹرنگ ڈیسک)عوامی مسلم لیگ کے سربراہ وراولپنڈی کے 2حلقوں این اے60اور62سے امیدوار شیخ رشید احمد نے مسلم لیگ ن راولپنڈی کی قیادت کو چکمہ دے کر انتخابی مہم کے اختتامی بڑے جلسوں کے لئے لیاقت باغ اپنے نام کر لیا شیڈول کے مطابق شیخ رشید 22جولائی کو لیاقت باغ میں این اے60کا آخری جلسہ منعقد کریں گے جس سے تحریک انصاف کے سربراہ عمران خان بھی خطاب کریں گے ۔

جبکہ 23جولائی کو لیاقت باغ میں حلقہ این اے62کا اختتامی جلسہ عام منعقد کیا جائے گاجبکہ 23جولائی رات12بجے کے بعد انتخابی مہم بند ہو جائے گی۔ شیخ رشید احمد نے کاغذات نامزدگی جمع کراتے وقت دونوں حلقوں کے ریٹرننگ افسران کو پہلے ہی لیاقت باغ میں جلسے کے لئے درخواستیں جمع کرا دی تھیں جن میں22اور23جولائی کو لیاقت باغ میں اختتامی جلسوں کے لئے اجازت طلب کی گئی تھی جس کے بعد شیخ رشید کے حامیوں نے لیاقت میں مسلسل دونوں دن جلسوں کے لئے پہلے ہی تشہیری مہم شروع کر رکھی تھی اس ضمن میں سیاسی حلقوں کا کہنا ہے کہ شیخ رشید احمد بھرپورعوام رابطہ مہم کے ساتھ مخالفین کے خلاف نفسیاتی مہم بھی کامیابی سے چلا رہے ہیں جس کے تحت انہوں نے دونوں دن لیاقت باغ میں جلسوں کا پیشگی اعلان کر کے مخالفین کے لئے لیاقت باغ میں جلسے کا راستہ بند کر دیا ہے اور شہر میں ان کی بڑی سیاسی حریف جماعت مسلم لیگ ن کو متبادل جگہ کا انتخاب کرنا پڑے گا سیاسی حلقوں کے مطابق مسلم لیگ ن ٹکٹوں کی تقسیم میں تاخیر اور اس کے بعد پیدا ہونے والی الجھنوں میں پھنسی رہی جرگوں ، صلح صفائی اور ٹکٹ سے محروم امیدواروں کو منانے میں مصروف مسلم لیگ ن کو بروقت اندازاہ ہی نہ ہو سکا یہاں یہ امر قابل ذکر ہے کہ لیاقت باغ کا تاریخی گراؤنڈ ہمیشہ سے سیاسی سرگرمیوں کا محور رہا ہے اور بالخصوص ہر بڑی سیاسی جماعت یا سیاسی اتحاد کی کوشش رہی ہے کہ انتخابی مہم کا آخری جلسہ لیاقت باغ منعقد کیا جائے ۔

موضوعات:شیخ رشید