کراچی (نیوز ڈیسک) اداکار حمزہ علی عباسی نے آئی ایس آئی پر لیگی امیدوار پر تشدد کا الزام لگانے پر سابق وزیراعظم نواز شریف کو شدید تنقید کا نشانہ بنایا، سماجی رابطے کی ویب سائٹ ٹوئیٹر پر اپنے پیغام میں حمزہ علی عباسی نے کہا کہ نواز شریف! تم نے کلبھوشن یادیو کے خلاف ایک لفظ نہیں بولا،

پاکستان پر ممبئی حملوں کی منصوبہ بندی کا الزام لگانے کے بعد اب تم اپنے پیسے اور طاقت بچانے کے لیے لوگوں کو آئی ایس آئی اور پاک فوج کے خلاف بھڑکا رہے ہو۔ شرم کرو نواز شریف، میری دعا ہے کہ بہت جلد تم جیل میں سڑ رہے ہوگے۔ حمزہ علی عباسی نے ایک اور ٹویٹ پیغام میں لکھا کہ 2013 میں دھاندلی کے الزامات پر پی ٹی آئی کے 4 حلقے کھولنے کے مطالبے کو جمہوریت کے خلاف سازش کہنے والی ن لیگ اب اپنی شکست دیکھتے ہوئے الیکشن 2018 سے پہلے ہی دھاندلی کا رونا رونے لگی ہے اور آئی ایس آئی پر براہ راست الزامات لگا رہی ہے اور دیکھنا ہارنے کے بعد دھرنے بھی دے گی، اللہ کی شان۔ واضح رہے کہ لندن میں سابق وزیراعظم میاں نواز شریف نے میڈیا سے بات چیت کرتے ہوئے کہا کہ ملتان میں ہمارے امیدوار رانا اقبال سراج کو تھپڑ مارے گئے اور خطرناک نتائج کی دھمکیاں دی گئیں، اگر انتخابات میں دھاندلی ہوئی تو طوفان اٹھے گا جسے سنبھالنا مشکل ہوگا۔ نواز شریف کے اسی بیان کو ان کے اپنے لیگی امیدوار نے جھٹلا دیا اور اپنے ویڈیو بیان میں سارے معاملے کی تردید کرتے ہوئے کہا کہ ان کے گودام پر پیش آئے جس واقعے کا ذکر کیا جا رہا ہے وہ غلط فہمی کا نتیجہ تھا۔ انہوں نے کہا کہ ان کے گودام پر محکمہ زراعت کے حکام آئے اور اداروں کے بارے میں ان کی جو غلط فہمی تھی وہ دور ہوچکی ہے اور ان کے معاملے سے کسی ادارے کا کوئی تعلق نہیں اور وہ اپنے گزشتہ بیان کی تردید کرتے ہیں۔