اسلام آباد(مانیٹرنگ ڈیسک)بوہری برادری آج پورے مذہبی جوش و خروش سے عیدالفطر منارہی ہے۔پوری دنیا بھر میں آباد بوہری برادری قدیم مصری کلینڈر کے مطابق مذہبی تہوار مناتی ہے اس لیے پوری دنیا میں ایک ساتھ اورایک ہی دن ان کے مذہبی تہوار کے اجتماعات منعقد ہوتے ہیں ۔پاکستان اور بھارت میں عموماً بوہری برادری رمضان المبارک کا آغاز بھی ایک دو دن قبل اپنے روایتی کلینڈر سے کرتی ہے اور اسی طرح عیدالفطر بھی ایک دو دن پہلے ہی مناتی ہے۔
بوہری برادری کی غالب اکثریت کراچی میں مقیم ہے اس لیے عید کا سب سے بڑا اجتماع حسب معمول طاہری مسجد کراچی میں ہوا۔ جہاں نماز کی ادائیگی کے بعد ملک کی سلامتی و استحکام کے لیے دعائیں مانگی گئیں۔پاکستان میں مقیم دیگر اہل وطن عیدالفطرکل منائیں گے یا ہفتہ کو؟ اس کا فیصلہ کرنے کے لیے مرکزی رویت ہلال کمیٹی کا اجلاس آج چیئرمین مفتی منیب الرحمٰن کی زیرصدارت منعقد ہوگا۔محکمہ موسمیات کے مطابق آج شوال کا چاند نظرآنے کے امکانات انتہائی کم ہیں۔
