اسلام آباد(مانیٹرنگ ڈیسک)وفاقی دارالحکومت اسلام آباد میں گاڑی کی ٹکر سے عتیق نامی نوجوان کو جاں بحق کرنے والے امریکی ایئر ڈیفنس اتاشی کرنل جوزف کو امریکا منتقل کرنے کی کوشش ناکام بنا دی گئی۔نجی ٹی وی کے مطابق کرنل جوزف کو لینے کے لیے امریکی طیارہ نور خان ایئر بیس پر آیا تاہم وزارت داخلہ سے این او سی نہ ملنے کے باعث امریکی طیارہ
خالی واپس لوٹ گیا۔گزشتہ روز ہی اسلام آباد ہائی کورٹ نے کہا تھا کہ امریکی سفارتکار کو سفارتی استثنیٰ حاصل نہیں ہے لہذا حکام ان کا نام ای سی ایل ڈالنے یا نہ ڈالنے کے حوالے سے دو ہفتوں میں فیصلہ کریں۔واضح رہے کہ اس سے پہلے نجی ٹی وی نے دعویٰ کیا تھا کہ کرنل جوزف کو امریکی طیارہ لینے اسلام آباد پہنچ گیا ہے جسے قطر منتقل کیا جائیگا۔
