اسلام آباد(سی پی پی )وزارت مذہبی امور و بین المذاہب ہم آہنگی نے سرکاری حج سکیم کی قرعہ اندازی میں کامیاب ہونے والے عازمین حج کو ہدایات دی ہیں کہ وہ فوری طور پر اپنے پاسپورٹ متعلقہ بینکوں میں جمع کرا دیں۔ وزارت کے حکام کے مطابق مشین ریڈ ایبل پاسپورٹ کی مدت مئی 2019 تک ہونا ضروری ہے۔ حکام کے مطابق قرعہ اندازی میں ناکام ہونے والے افراد متعلقہ بینکوں سے اپنی رقم نکال سکتے ہیں، اس سلسلہ میں وزارت سے منظوری حاصل کرنے کی کوئی
ضرورت نہیں ہے۔وزارت کے حکام کے مطابق ناکام ہونے والے عازمین حج اپنے متعلقہ بینکوں سے رقوم نکلوا سکتے ہیں تاہم اس ضمن میں کوئی بینک عذر، حیل و حجت کا مظاہرہ کرے تو فوری طور پر وزارت کے اس فون نمبر 051-9208465 پر اطلاع دیں۔ قرعہ اندازی میں کامیاب ہونے والے حجاج کے نام وزارت کی ویب سائٹwww.mora.gov.pk پر ڈال دیئے گئے ہیں، درخواست دہندگان اپنے نام www.hajjinfo.com پر کلک کر کے اپنے نام چیک کر سکتے ہیں
