واشنگٹن(این این آئی)امریکہ میں پاکستانی سفیر اعزاز احمد چودھری نے کہا ہے کہ لشکر طیبہ پر پاکستان میں بھی پابندی ہے جب کہ ملی مسلم لیگ الیکشن کمیشن میں اپنا اندراج کرانے کی کوشش کر رہی ہے تاکہ وہ انتخابات میں شریک ہو سکے تاہم اس بارے میں حکومت پاکستان کے اپنے تحفظات ہیں جنھیں واضح طور پر بیان کیا گیا ہے۔بھارت جاسوس اوردہشتگرد بھیج کر پاکستان کے لیے مشکلات کھڑی کرر ہاہے۔
امریکی نشریاتی ادارے سے بات چیت کرتے ہوئے امریکہ میں پاکستانی سفیر اعزاز چوہدری نے عدالتوں بارے پوچھے گئے ایک سوال کے جوا ب میں کہاکہ کسی بھی جمہوریت میں قانون کی حکمرانی کی اولین اہمیت ہوا کرتی ہے، جو کردار وہ ملک میں ادا کر رہی ہیں۔انہوں نے کہاکہ عدالتی عمل کے حوالے سے میں کسی قسم کی رائے زنی نہیں کر سکتا اور یہ کہ قانون کے حکمرانی کے عمل کو ہی سب باتوں پر سبقت حاصل ہوتی ہے۔افغانستان میں بھارت کے کردار کے بارے میں ایک سوال پر سفیر نے کہا کہ اگر یہ معیشت اور ترقی تک محدود ہے تو پاکستان کو اس پر قطعاً کوئی اعتراض نہیں۔تاہم، اْنھوں نے کہا کہ ہم سمجھتے ہیں کہ بھارت کو اس بات کی اجازت نہیں ہونی چاہیئے کہ وہ افغان سرزمین استعمال کرتے ہوئے، اپنی حکمتِ عملی کے مقاصد کو آگے بڑھائے یا پاکستان کے لیے عدم استحکام کا باعث بنے۔اعزاز چودھری نے کہا کہ جب امریکہ نے جنوبی ایشیا کے بارے میں نئی حکمت عملی کا اعلان کیا تھا اس میں اس بات کا اشارہ دیا گیا تھا کہ افغانستان میں بھارت کا ایک وسیع کردار ہوگا۔ اْنھوں نے کہا کہ ہم یہ جاننا چاہتے ہیں کہ یہ کردار کیا ہوگا۔ آیا یہ ترقیاتی نوعیت کا ہوگا؛ معاشی، فوجی یا اسٹریٹجک کردار ہوگا۔انہوں نے کہاکہ ہم یہ دیکھ چکے ہیں کہ بھارت افغانستان کی سرزمین استعمال کرتے ہوئے اپنے دو مقاصد آگے بڑھا رہا ہے۔ ایک یہ کہ پاکستان کے خلاف دو محاذ والی صورت حال پیدا کی جائے اور دوسرا یہ کہ جاسوس اور عدم استحکام پیدا کرنے والے عناصر بھیج کر پاکستان کے لیے مشکلات کھڑی کی جائیں۔بظاہر کلبھوشن جادیو کی جانب اشارہ کرتے ہوئے اْنھوں نے کہا کہ حالانکہ وہ افغانستان سے پاکستان میں داخل نہیں ہوئے، وہ بھارتی بحریہ کے حاضر سروس کمانڈر ہیں، جو انٹیلی جنس کا کام کیا کرتے تھے۔
