اسلام آباد ہائی کورٹ (آن لائن) اسلام آباد ہائی کورٹ میں فیض آباد دھرنا کیس میں راجہ ظفرالحق رپورٹ  پیش نہ کی جاسکی، عدالت شدید برہم۔سوموار کو اسلام آباد ہائی کورٹ کے جج جسٹس شوکت عزیز صدیقی کی عدالت میں فیض آباد دھرنا کیس کی سماعت شروع ہوئی تو سیکرٹری دفاع اور ڈپٹی اٹارنی جنرل راجہ ارشد کیانی عدالت میں پیش ہوئے ،سیکرٹری دفاع نے اپنی رپورٹ عدالت میں پیش کی، عدالت نے راجہ ظفرالحق رپورٹ پیش کرنے کا کہا،

جس پر ڈپٹی اٹارنی جنرل کا کہنا تھا کہ رپورٹ فائنل نہیں ہے، عدالت نے استفسار کیا رپورٹ کب تک فائنل ہوگی؟ عدالت نے مزید ریمارکس دیتے ہوئے کہا کیوں نہ آج توہین عدالت کا نوٹس جاری کر دیں ،عدالت کے ساتھ چھپن چھپائی کا کھیل نہ کھیلا جائے، آپ یہ چاہتے ہیں کہ چئیرمین سینٹ اور سپیکر قومی اسمبلی سے براہ راست ریکارڈ طلب کرنا پڑے، اگر 20 فروری تک رپورٹ پیش نہ ہوئی تو وزیراعظم سمیت دیگر وزراء4 کو توہین عدالت کا نوٹس جاری کریں گے۔