مردان(آن لائن)مردان میں زیادتی کے بعد قتل کی جانے والی ننھی اسماء کا کم عمر سفاک قاتل گرفتار ہوگیا،جس نے اپنے جرم کا اعتراف بھی کرلیا جبکہ ملزم کے ساتھی کو بھی گرفتار کرلیاگیا۔پشاور میں پریس کانفرنس کرتے ہوئے آئی جی پولیس خیبرپختونخواہ صلاح الدین محسود نے بتایا کہ اسماء قتل کیس میں ملزم محمد نبی نے اعتراف جرم کرلیا جس کی عمر15سال ہے،مردان کی 4سالہ ننھی اسماء کے قاتل کو 25روز کے اندر گرفتار کرلیاگیا،

ملزم محمد نبی اسماء کا پڑوسی اور اس کا کزن ہے جبکہ ملزم کا دوسرا ساتھی عبدالقادر بھی پولیس کی حراست میں ہے،بچی پر جنسی تشدد کرنے کی کوشش کی گئی تاہم بچی نے مزاحمت کی اور چیخ وپکار کی تو ملزمان نے اس کا گلہ دبا کر قتل کردیا،پولیس بچی کی گردن پر لگے خون اور ڈی این اے کی مدد سے ملزم تک پہنچنے میں کامیاب ہوئی۔آئی جی کا مزید کہنا تھا کہ کے پی کے کی پولیس ایک صوبے کی نہیں بلکہ پورے ملک کی پولیس ہے جو دہشتگردی کے خلاف بھی فرنٹ لائن پر ہے۔کوہاٹ کی عاصمہ رانی قتل کیس سے متعلق ان کا کہنا تھا کہ لڑکی کے اہلخانہ نے ہم پر اعتماد کیا اور عاصمہ کے کیس میں بھی2ملزمان گرفتار ہیں جبکہ آلہ قتل بھی برآمد کرلیا گیا ہے۔انہوں نے مزید کہا کہ مردان کی ننتھی اسماء کا قاتل محمد نبی ولد عبیدالرحمان ایک ریسٹورنٹ میں ملازم تھا اور وہ اس روز شادی کی تقریب میں شرکت کے لئے آیا ہوا تھا۔دن کو3بجے اس نے بچی کو گھر جانے کے لئے کہا اور قریب ہی گنے کے کھیت میں لے گیا،جہاں اس نے بچی کے ساتھ زیادتی کی کوشش کی جس پر بچی کی طرف سے مزاحمت اور چیخ وپکار پر ڈر کر بچی کا گلہ دبا دیا۔