لاہور( این این آئی) جمعیت علمائے اسلام(ف) کے سربراہ مولانا فضل الرحمن نے وزیر اعلیٰ شہباز شریف اور سابق صدر مملکت و پیپلز پارٹی پارلیمنٹرینز کے صدر آصف علی زرداری سے لاہور میں ملاقات کی ۔ جس میں مجموعی سیاسی ، بلوچستان کی صورتحال، فاٹا انضمام ،
سینیٹ انتخابات سمیت دیگر اہم معاملات پر تبادلہ خیال کیا گیا ۔ تفصیلات کے مطابق مولانا فضل الرحمن اور وزیر اعلیٰ شہباز شریف کے درمیان ملاقات اچانک طے پائی جو تقریباً ایک گھنٹہ سے زائد وقت تک جاری رہی۔ بتایاگیا ہے کہ ملاقات میں ملک کی موجودہ مجموعی صورتحال پر تفصیلی تبادلہ خیال کیا گیا ۔ مولانا فضل الرحمن اور شہباز شریف نے نماز جمعہ اکٹھے ادا کی ۔ اس کے بعد مولانا فضل الرحمن نے بلاول ہاؤس لاہو رمیں سابق صدر مملکت و پیپلز پارٹی پارلیمنٹرینز کے سربراہ سے ملاقات کی جس میں مجموعی صورتحال پر تفصیلی تبادلہ خیال کیا گیا ۔بتایا گیا ہے کہ دونوں رہنماؤں نے عمران خان اور شیخ رشید کے پارلیمنٹ سے متعلق بیان کو غیر مناسب قرار دیا۔ مولانا فضل الرحمان نے دو پہر کا کھانا بھی سابق صدر آصف زرداری کی ہمراہ کھایا۔دوسری طرف سیاسی حلقوں کا کہنا ہے کہ بظاہر مولانا فضل الرحمن کی ملاقاتیں (ن) لیگ اور پیپلز پارٹی کے درمیان مفاہمتی کردار معلوم ہوتی ہیں اور اس پر بحث بھی کی جارہی ہے۔
