لاہور(آن لائن)ملک کے معروف کالم نویس، مصنف اور ڈرامہ نگار منو بھائی طویل علالت کے بعد 84 برس کی عمر میں انتقال کرگئے۔خاندانی ذرائع کے مطابق منو بھائی گزشتہ کچھ عرصے سے علالت کے باعث لاہور کے ایک ہسپتال میں زیر علاج تھے۔1933 میں پنجاب کے شہر وزیرآباد میں پیدا ہونے والے منو بھائی کا اصل نام منیر احمد قریشی تھا لیکن انہیں منو بھائی کے نام سے جانا جاتا تھا۔منو بھائی نے پاکستان ٹیلی ویڑن (پی ٹی وی) کے

لیے متعدد ڈرامے تحریر کیے جبکہ ان کا مشہور ڈرامہ سونا چاندی تھا۔پاکستان کے لیے بے پناہ خدمات پر 2007 میں انہیں صدارتی تمغہ برائے حسن کارکردگی سے نوازا گیا۔دریں اثناء4 منو بھائی کے انتقال پر صدر مملکت ممنون حسین نے منو بھائی کے انتقال پر تعزیت کا اظہار کرتے ہوئے ان کی مغفرت، بلندی درجات اور لواحقین کے لئے صبر جمیل کی دعا کی۔وزیراعلیٰ پنجاب شہباز شریف نے منو بھائی کے انتقال پر دکھ اور افسوس کا اظہار کرتے ہوئے سوگوار خاندان سے دلی ہمدردی کا بھی اظہار کیا۔وزیراعلیٰ پنجاب کا کہنا تھا کہ منو بھائی اردو ادب میں نمایاں مقام رکھتے تھے جن کی ادبی و صحافتی خدمات لائق تحسین اور ناقابل فراموش ہیں اور ان کی ادب اور صحافت کے لئے خدمات کو تادیر یاد رکھا جائے گا۔سابق صدر اور پاکستان پیپلز پارٹی کے شریک چیئرمین آصف علی زرداری کی جانب سے افسوس کا اظہار کیا گیا۔اپنے تعزیتی پیغام میں آصف علی زرداری نے کہا کہ منو بھائی ترقی پسند دانشور تھے اور صحافت اور ادب کے لیے ان کی خدمات ناقابل فراموش ہیں